وسكەمەندە مەكتەپ مۇعالىمى كوز جۇمدى. مارقۇمنىڭ تۋىستارى مەن ارىپتەستەرى پەداگوگتىڭ ءولىمىن مەكتەپ ديرەكتورىنان كورىپ وتىر. ويتكەنى ول سوڭعى كەزدەرى باسشىلىق تاراپىنان ۇنەمى قىسىمعا كورىپ جۇرگەنىن ايتىپ، بىرنەشە مۇعالىممەن بىرگە قۇزىرلى ورگاندارعا شاعىم جازعان. قاداعالاۋشى ورگاندار تەكسەرۋدى ەندى باستاعاندا 38 جاستاعى كەلىنشەك دۇنيەدەن وتكەن، دەپ حابارلايدى Stan.kz اقپارات اگەنتتىگى Qazaqstan ارناسىنا سىلتەمە جاساپ.
مارقۇم مۇعالىمنىڭ ارىپتەستەرى ءالى كۇڭگە دەيىن كوز جاسىن تيا الار ەمەس. ولار اسەم نۇرعاليەۆامەن وسكەمەندەگى №5 ورتا مەكتەپتە بىرگە جۇمىس ىستەگەن. اعا تالىمگەر ديرەكتور تاراپىنان قۋدالاۋعا ۇشىراعانىن ۇنەمى ايتىپ ءجۇرىپتى.
«ول ءوزى قاتتى سترەسستەن ميىم قايناپ ءجۇر، شىداي المايمىن دەدى. قۋدالاپ، ەسىمدى شىعارىپ ءبىتتى دەدى»، - دەپ مالىمدەدى وسكەمەن قالالىق №5 ورتا مەكتەپتىڭ باستاۋىش سىنىپ مۇعالىمى ساۋلە باپينوۆا.
20 كۇن بۇرىن كوز جۇمعان مۇعالىم ارىپتەسىمەن بىرگە قۇزىرلى ورگاندارعا شاعىم تۇسىرگەن. ءبىلىم سالاسىنداعى باقىلاۋ دەپارتامەنتى جوسپاردان تىس تەكسەرۋ جۇرگىزىپ، مەكتەپ ديرەكتورىنىڭ زاڭعا قايشى ارەكەتتەرىن اشكەرەلەگەن.
«بارلىق فاكتىلەر راستالدى. اتاپ ايتساق، بۇل كىسى تامىز ايىندا جۇمىسقا تۇرعان. سول كەزدە مەكتەپتە جوندەۋ جۇمىستارى ءجۇرىپ جاتقان. سول كەزدە مەكتەپتىڭ اۋلاسىن تازالاۋ جۇمىستارىنا تارتىلعان. اتتەستاتسيادان وتۋگە قارسىلىق كورسەتكەن، مەكتەپ باسشىسى جانە ونىڭ ورىنباسارى»، - دەدى ءبىلىم بەرۋ سالاسىنداعى ساپانى قامتاماسىز ەتۋ دەپارتامەنتى باسشىسىنىڭ ورىنباسارى جۇمابەك قامبەتوۆ.
تەكسەرۋ قورىتىندىسى بويىنشا مەكتەپ ديرەكتورىنا قاتىستى 6 اكىمشىلىك ءىس قوزعالعان. وسى كەزدە شاعىم جازعان اسەم نۇرعاليەۆا اۋرۋحاناعا ءتۇسىپ، ءبىر اپتا ەس-ءتۇزسىز جاتىپ، كوز جۇمعان.
«دەنە قىزۋى كوتەرىلىپ، ورۆي بولعاندا ميدىڭ ءىسىنۋى بولادى دەدى. دارىگەردىڭ بىزگە العاش ايتقانى وسىنداي دياگنوز بولدى. ال ەندى مەنينگيت بولعان جاعدايدا، نەگە دارىگەرلەر انا مەكتەپتى جاپپايدى. مەنينگيتتىڭ ءوزى دە جۇقپالى اۋرۋ عوي»، - دەدى مارقۇمنىڭ ناعاشى اپاسى عافۋرا داراباەۆا.
مەكتەپ ديرەكتورى دارىگەرلەردىڭ ءولىم تۋرالى انىقتاما قورىتىندىسىنا سۇيەنىپ، ءوزىن ايىپتى سەزىنبەيدى.
«ول مينينگيتتەن قايتىس بولدى. بۇل جۇقپالى اۋرۋ. ال مەكتەپتەگى پسيحولوگيالىق احۋالدى اۋىر دەپ ەسەپتەمەيمىن. ەشكىمگە قىسىم كورسەتىلگەن جوق»، - دەدى وسكەمەن قالالىق №5 ورتا مەكتەپ ديرەكتورى ناتاليا كارپوۆا.
وسى جاعداي بويىنشا قالالىق ءبىلىم ءبولىمى دە تەكسەرۋ جۇرگىزگەن. ناتيجەسىندە مەكتەپ ديرەكتورىن قىزمەتىنەن بوساتۋ تۋرالى شەشىم قابىلدادى. ال كوز جۇمعان مۇعالىمگە قاتىستى قۇقىق قورعاۋ ورگاندارىندا ازىرگە ەشقانداي ءىس تىركەلمەگەن. مارقۇمنىڭ سوڭىندا ەكى بالاسى قالدى.
"ادىرنا" ۇلتتىق پورتالى
