قازاقستاندىق Instagram-اككاۋنتتاردىڭ بىرىندە توتەنشە جاعداي كەزىندە 42 500 تەڭگە العان بارلىق جۇمىسسىزدار ەندى 20 000 تەڭگەنى مەملەكەتكە قايتارۋعا مىندەتتى ەكەنى تۋرالى جاڭالىق تالقىلانۋدا. بۇل اقپاراتتى قر ەڭبەك جانە حالىقتى الەۋمەتتىك قورعاۋ مينيسترلىگى جوققا شىعاردى، دەپ حابارلايدى «ادىرنا» ۇلتتىق پورتالى Stan.kz اقپارات اگەنتتىگىنە سىلتەمە جاساپ.
42 500 تەڭگە مولشەرىندەگى الەۋمەتتىك تولەم مەملەكەتتىك الەۋمەتتىك ساقتاندىرۋ قورىنىڭ (ماسق) قاراجاتى ەسەبىنەن تولەندى. ول كارانتيندىك شەكتەۋلەر مەن توتەنشە جاعداي رەجيمىنە بايلانىستى كىرىسىنەن ايىرىلعان جۇمىس ىستەيتىن ازاماتتارعا بەرىلدى.
"ەگەر ازامات جۇمىسسىز بولسا، ونىڭ قازاقستان رەسپۋبليكاسى اۋماعىندا بارلىق جەردە قىزمەتكە شەكتەۋلەر ەنگىزىلۋىنە بايلانىستى تابىسىنان ايىرىلۋى مۇمكىن ەمەس. تيىسىنشە، ول 42 500 تەڭگە الماۋعا ءتيىس جانە ءوزىن-ءوزى جۇمىسپەن قامتۋشى رەتىندە تولەم الۋعا ءوتىنىش بەرمەۋى كەرەك ەدى، ويتكەنى ول بۇل ساناتقا جاتپايدى. دەگەنمەن، ماسق 42 500 تەڭگە العان جۇمىسسىزداردان 20 000 تەڭگە كولەمىندەگى قاراجاتتى قايتارۋدى تالاپ ەتىپ جاتپاعانىن اتاپ وتكەنىمىز ءجون", – دەپ حابارلادى قر ەڭبەك جانە حالىقتى الەۋمەتتىك قورعاۋ مينيسترلىگىنەن.
دەمەك، قازاقستاندىقتاردى بۇرىن العان الەۋمەتتىك تولەمدەردى قايتارۋعا مىندەتتەيدى دەگەن حابارلاما شىندىققا جاناسپايدى. بۇعان دەيىن دە وسى سارىنداعى اقپاراتتار پايدا بولعان. ەڭبەك جانە حالىقتى الەۋمەتتىك قورعاۋ مينيسترلىگى ولاردى دا جوققا شىعاردى.
