قىرعىزستاننىڭ ۇزگەن جانە قاراسۋ اۋدانىنىڭ حالقى ءساۋىر ايىنىڭ 14-نەن باستاپ ميتينگ ۇيىمداستىرىپ جاتىر. ولار وزبەكستانعا سۋ قويماسىنىڭ ماڭىنداعى جەردى بەرۋگە قارسىلىق بىلدىرۋدە.
ميتينگكە شىعۋشىلار سانى 4 مىڭنان اسادى. ولار كەمپىر-اباد سۋ قويماسىنىڭ ماڭىنداعى جەردى وزبەكستانعا بەرۋگە قارسىلىق تانىتۋدا. 23-25 ناۋرىز كۇندەرى قىرعىزستاننىڭ بيلىك وكىلدەرى تاشكەنتكە بارىپ، ەكى ەل اراسىندا جىلدار بويى شەشىمىن تاپپاعان شەكارا ماسەلەسىن رەتتەۋ بويىنشا كەلىسسوزدەر وتكىزدى. تاراپتار ماسەلەنى تولىق شەشۋ ءۇشىن بىرنەشە جەر اۋماعىن الماسۋعا كەلىستى. ەكى ەل ازاماتتارى بۇل شەشىمدى ءار ءتۇرلى قابىلدادى. ءبىر تاراپ قولداسا، ەكىنشى تاراپ قارسىلىق ءبىلدىرىپ جاتتى. 14-ساۋىردەن باستاپ سۋ قويماسىنىڭ ماڭىنداعى اۋىل تۇرعىندارى ۇزاق مەرزىمدى ميتينگكە شىقتى. ولاردىڭ تالاپتارىن تىڭداپ، كەلىسسوزگە كەلۋ ءۇشىن قىرعىزستاننىڭ ۇلتتىق قاۋىپسىزدىك كوميتەتىنىڭ باسشىسى قامشىبەك تاشيەۆ نارازى توپقا بىرنەشە مارتە كەلدى. ول سۋ قويماسىنىڭ ماڭىنداعى 50 گەكتار جەردى ەمەس، 20 گەكتار جەردى بەرۋ بويىنشا قايتا كەلىسسوز وتكىزۋگە تاشكەنتكە ۇسىنىس تاستايتىنىن جەتكىزدى. الايدا بۇل ۇسىنىس حالىقتى تىنىشتاندىرعان جوق. سالدارىنان اۋقىمدى ميتينگتەر قايتا جالعاسىن تاپتى. 25-ءساۋىر كۇنى ۇقك باسشىسى تاشيەۆ نارازى حالىقپەن كەزەكتى مارتە كەزدەستى. كەزدەسۋ بارىسىندا حالىق پەن ۇقك باسشىسىنىڭ اراسىندا پىكىر قايشىلىعى بايقالدى.
ۇزگەن اۋدانىنىڭ تۇرعىنى ميكروفوندى الىپ، قامشىبەك تاشيەۆكە: «ءبىز ءسىزدى قولدادىق. ال قازىر ءسىزدى قولدايتىندار مۇلدە قالمادى...بۇل ءبىزدىڭ اتا-بابامىزدىڭ جەرى، بۇل قىرعىزستاننىڭ جەرى. ۇزگەن جەرىندە مىنا تۇرعان بىزدەر وستىك. قالايشا سىزدەر بۇل جەردى بىرەۋگە بەرمەكسىزدەر؟! ءبىز وعان رۇقسات بەرە المايمىز. ءبىزدىڭ وزىمىزگە بۇل جەر جەتپەيدى. ءسىزدىڭ اتا-اناڭىزدىڭ، بابالارىڭىزدىڭ جەرىن الىپ، سونى بەرەيىك. سول جەرلەردى بەرىڭىز», - دەدى.
بۇل سوزدەردى ەستىگەن ۇقك باسشىسى قامشىبەك تاشيەۆ ميكروفوندى تۇرعىننىڭ قولىنان جۇلىپ الىپ، اتا-اناسىنا ءتىل تيگىزبەۋدى سۇرادى. «مەنىڭ اتا-اناما ءتىل تيگىزبەڭىزدەر. ولارعا قاتىستى نە ايتىلىپ، نە جازىلىپ جاتقانىن ەستىپ، كورىپ ءجۇرمىن. ءتىپتى اتام مەن اجەمە دەيىن ءتىل تيگىزىپ جاتىر. مەنىڭ اكەمە ءتىل تيگىزىپ، شابۋىل جاساعانداردىڭ ءتىلىن سۋىرىپ الامىن. اتا-اناما شابۋىل جاساعان كەز كەلگەنىن سويتەمىن. قازىر مىنا جەردە 20-30 ادام ايعايلاپ تۇر، مەيلى 100, مەيلى 1000 ادام بولسىن... بىراق مەنى ءجۇز مىڭداعان، ميلليونداعان حالىق قولداعان. ءتارتىپتى بولايىق. مىنا جەردى اقساقالدارىمىز وتىر. سىزدەرگە بارلىعىن ايتۋ ءۇشىن جاقسى پيعىلمەن كەلىپ تۇرمىن عوي»، - دەدى ۇقك باسشىسى.
قىرعىزستان مەن وزبەكستان اراسىنداعى جەر داۋى 1991-جىلدان بەرى جالعاسىپ كەلەدى. ءدال وسىنداي جاعداي كورشىلەس تاجىكستانمەن دە قايتالانۋدا. شەكارا ماڭىندا جىل سايىن جەرگە بايلانىستى قاقتىعىستار بولىپ تۇرادى.
اسحات قاسەنعالي،
"ادىرنا" ۇلتتىق پورتالى
