تۇركىستان – تۇركى الەمىنىڭ مادەني استاناسى

3282
Adyrna.kz Telegram

وڭتۇستىك قازاقستان وبلىسىندا «تۇركىستان – تۇركى الەمىنىڭ مادەني استاناسى» ءىس-شاراسىنىڭ سالتاناتتى اشىلۋى مەن ناۋرىز مەرەكەسىنە ارنالعان تۇركى الەمىنىڭ «ناۋرىزناما» شاراسى ءوتتى.

تۇركى ەلدەرىنىڭ تاعدىرىن توعىستىرعان كيەلى تۇركىستان تورىندەگى ءدۇبىرلى شاراعا 23 مەملەكەتتەن كەلگەن تۇركىتىلدەس 25 ۇلتتان تۇراتىن 300-گە تارتا شەتەلدىك قوناقتار، حالىقارالىق ۇيىم وكىلدەرى، قازاقستاندىق زيالى قاۋىم جانە ونەر تۇلعالارى، بۇقارالىق اقپارات قۇرالدارى مەن وڭتۇستىكقازاقستاندىق تۇرعىندار، ياعني، جالپى سانى 10 مىڭعا جۋىق ادام قاتىستى. ولاردىڭ ىشىندە، قر مادەنيەت جانە سپورت ءمينيسترى ارىستانبەك مۇحامەديۇلى مەن «تۇركسوي» حالىقارالىق ۇيىمىنىڭ باس حاتشىسى دۇيسەن قاسەيىنوۆتەر سىندى ءار ەلدىڭ جوعارى لاۋازىمدى رەسمي وكىلدەرى بار.

مەرەكەلىك ءىس-شاراعا كەلگەن مەيماندار، ەڭ الدىمەن، قوجا احمەت ياساۋي كەسەنەسى مەن ونىڭ اينالاسىنا جەرلەنگەن قازاق حاندارى، ابىز-اۋليەلەرى، بيلەرى مەن باتىرلارىنا ارنالعان پانتەونمەن تانىستى. مۇنان سوڭ، مەيماندار تۇركىستان تاريحي مۋزەيىن ارالاپ، ونداعى جادىگەرلەرمەن تانىستى. ال قولونەر شەبەرلەرىنىڭ اۋىلىنا باس سۇققان حالايىق ءتۇرلى بۇيىمداردى وزدىگىنشە جاساپ كورىپ، ءبىر ءسات باعزى زامانعا تاپ بولعانداي اسەر الدى.

ءىس-شارانىڭ سالتاناتتى اشىلۋىندا ءسوز باستاعان وڭتۇستىك قازاقستان وبلىسىنىڭ اكىمى جانسەيىت تۇيمەباەۆ بارشا جۇرتشىلىقتى تۇركىستاندى تۇركى الەمىنىڭ مادەني استاناسى جىلى اتانۋىمەن قۇتتىقتاپ، وسى ابىرويلى مىندەتتى بىرلەسە وتكىزۋگە شاقىردى.

«تۇركى الەمىنىڭ بۇگىنگى زامانداعى كەمەڭگەر كوشباسشىسى اتانعان پرەزيدەنتىمىز نۇرسۇلتان ءابىشۇلى نازارباەۆ «تۇركسوي» تۇركى الەمىنىڭ يۋنەسكو-سىنا اينالۋى ءتيىس» دەگەن بولاتىن. وسى تۇركسوي ۇيىمى تۇركى الەمىنىڭ مادەني استانالارىن تاڭداۋ جوباسىن 2012 جىلدان بەرى جۇزەگە اسىرىپ كەلەدى. تۇركسوي ۇيىمى شىنىندا دا تۇركى دۇنيەسىنىڭ يۋنەسكو-سىنا اينالدى»، – دەدى جانسەيىت قانسەيىتۇلى.

مۇنان سوڭ، وسىناۋ تاريحي شارا بارىسىندا تۇركسوي حالىقارالىق ۇيىمىنىڭ «ءباسپاسوز سىيلىعى» شەتەلدىك جانە قازاقستاندىق 15 ۇزدىك جۋرناليستكە تاپسىرىلىپ، مەرەكە جالعاسى الەمدىك دەڭگەيدەگى كونتسەرتتىك باعدارلاماعا ۇلاستى. وندا 500-گە جۋىق ءبيشى كۇن مەن ءتۇن، جۇلدىزدار بەينەسىندە «كۇن مەن ءتۇننىڭ تەڭەلۋى جانە تابيعاتتىڭ ويانۋى» تەاترلاندىرىلعان سازدى-حورەوگرافيالىق قويىلىمىن كورسەتتى. سونداي-اق، تۇركىتىلدەس حالىقتارعا ورتاق ۇلى تۇلعالار – ارىستان باب، ياسساۋي، ءال-فارابي، قورقىت اتا وبرازدارىنداعى كورىنىس ساحنالانسا، قازاق حاندارى كيەلى شاڭىراقتى كوتەرىپ، ونداعى ۋىقتاردى وڭىرىمىزدەگى 20 ەتنومادەني ورتالىقتىڭ وكىلدەرى ۇستاۋىمەن بەيبىت ەلىمىزدەگى تۇراقتىلىق پەن تاتۋلىقتى پاش ەتتى.

كونتسەرتتىك باعدارلاما بارىسىندا «ءسۇيىنشى. شاشۋ» كورىنىسى قويىلدى. وندا ۇلتتىق كيىمدەگى  اتتىلى جارشىلار «ناۋرىز» كەلگەنى  جونىندە ءسۇيىنشى سۇراپ، شاشۋ شاشتى. الاڭدا تۇركىتىلدەس مەملەكەتتەرگە ارنالعان 6 كيىز ءۇي كوتەرىلىپ، تۇركىتىلدەس مەملەكەتتەردىڭ «ناۋرىز» كەرۋەنى كەلدى. كەرۋەندە 18 تۇيە، 30  ات، 4 اربا جانە تۇركىتىلدەس مەملەكەتتەردەن كەلگەن 300-گە جۋىق مادەنيەت مايتالماندارى ونەر كورسەتتى.

سالتاناتتى جيىندا تۇركىتىلدەس مەملەكەتتەردىڭ الەم حالقىن بىرلىككە، دوستىققا، بەيبىتشىلىككە شاقىرۋعا ارناعان ۇندەۋى قابىلداندى.

«تۇركىستان – تۇركى الەمىنىڭ مادەني استاناسى» جىلىنىڭ اياسىندا، ناۋرىز مەرەكەسىنە وراي، تۇركىستان قالاسىندا تۇركى الەمىنىڭ «ناۋرىز» حالىقارالىق اقىندار ايتىسى مەن تۇركى الەمىنىڭ  «بۇراڭ بەل»  بي فەستيۆالى وتەدى.



وقو اكىمىنىڭ ءباسپاسوز قىزمەتى

پىكىرلەر