Túrkistan – Túrki áleminiń mádenı astanasy

3281
Adyrna.kz Telegram

Ońtústik Qazaqstan oblysynda «Túrkistan – Túrki áleminiń mádenı astanasy» is-sharasynyń saltanatty ashylýy men Naýryz merekesine arnalǵan Túrki áleminiń «Naýryznama» sharasy ótti.

Túrki elderiniń taǵdyryn toǵystyrǵan kıeli Túrkistan tórindegi dúbirli sharaǵa 23 memleketten kelgen Túrkitildes 25 ulttan turatyn 300-ge tarta sheteldik qonaqtar, halyqaralyq uıym ókilderi, qazaqstandyq zııaly qaýym jáne óner tulǵalary, buqaralyq aqparat quraldary men ońtústikqazaqstandyq turǵyndar, ıaǵnı, jalpy sany 10 myńǵa jýyq adam qatysty. Olardyń ishinde, QR Mádenıet jáne sport mınıstri Arystanbek Muhamedıuly men «TÚRKSOI» Halyqaralyq Uıymynyń Bas hatshysy Dúısen Qaseıinovter syndy ár eldiń joǵary laýazymdy resmı ókilderi bar.

Merekelik is-sharaǵa kelgen meımandar, eń aldymen, Qoja Ahmet Iasaýı kesenesi men onyń aınalasyna jerlengen qazaq handary, abyz-áýlıeleri, bıleri men batyrlaryna arnalǵan panteonmen tanysty. Munan soń, meımandar Túrkistan tarıhı mýzeıin aralap, ondaǵy jádigerlermen tanysty. Al qolóner sheberleriniń aýylyna bas suqqan halaıyq túrli buıymdardy ózdiginshe jasap kórip, bir sát baǵzy zamanǵa tap bolǵandaı áser aldy.

Is-sharanyń saltanatty ashylýynda sóz bastaǵan Ońtústik Qazaqstan oblysynyń ákimi Janseıit Túımebaev barsha jurtshylyqty Túrkistandy Túrki áleminiń mádenı astanasy jyly atanýymen quttyqtap, osy abyroıly mindetti birlese ótkizýge shaqyrdy.

«Túrki áleminiń búgingi zamandaǵy kemeńger kóshbasshysy atanǵan Prezıdentimiz Nursultan Ábishuly Nazarbaev «TÚRKSOI» túrki áleminiń IýNESKO-syna aınalýy tıis» degen bolatyn. Osy TÚRKSOI uıymy túrki áleminiń mádenı astanalaryn tańdaý jobasyn 2012 jyldan beri júzege asyryp keledi. TÚRKSOI uıymy shynynda da túrki dúnıesiniń IýNESKO-syna aınaldy», – dedi Janseıit Qanseıituly.

Munan soń, osynaý tarıhı shara barysynda TÚRKSOI Halyqaralyq uıymynyń «Baspasóz syılyǵy» sheteldik jáne qazaqstandyq 15 úzdik jýrnalıstke tapsyrylyp, mereke jalǵasy álemdik deńgeıdegi konerttik baǵdarlamaǵa ulasty. Onda 500-ge jýyq bıshi kún men tún, juldyzdar beınesinde «Kún men Túnniń teńelýi jáne Tabıǵattyń oıanýy» teatrlandyrylǵan sazdy-horeografııalyq qoıylymyn kórsetti. Sondaı-aq, Túrkitildes halyqtarǵa ortaq uly tulǵalar – Arystan bab, Iassaýı, Ál-Farabı, Qorqyt ata obrazdaryndaǵy kórinis sahnalansa, Qazaq handary kıeli shańyraqty kóterip, ondaǵy ýyqtardy óńirimizdegi 20 etnomádenı ortalyqtyń ókilderi ustaýymen beıbit elimizdegi turaqtylyq pen tatýlyqty pash etti.

Konerttik baǵdarlama barysynda «Súıinshi. Shashý» kórinisi qoıyldy. Onda Ulttyq kıimdegi  attyly jarshylar «Naýryz» kelgeni  jóninde súıinshi surap, shashý shashty. Alańda Túrkitildes memleketterge arnalǵan 6 kıiz úı kóterilip, Túrkitildes memleketterdiń «Naýryz» kerýeni keldi. Kerýende 18 túıe, 30  at, 4 arba jáne Túrkitildes memleketterden kelgen 300-ge jýyq mádenıet maıtalmandary óner kórsetti.

Saltanatty jıynda Túrkitildes memleketterdiń álem halqyn birlikke, dostyqqa, beıbitshilikke shaqyrýǵa arnaǵan úndeýi qabyldandy.

«Túrkistan – Túrki áleminiń mádenı astanasy» jylynyń aıasynda, naýryz merekesine oraı, Túrkistan qalasynda Túrki áleminiń «Naýryz» Halyqaralyq aqyndar aıtysy men Túrki áleminiń  «Burań bel»  bı festıvali ótedi.



OQO ákiminiń baspasóz qyzmeti

Pikirler