قازاقستان حالىق پارتياسىنىڭ ماجىلىستەگى فراكتسياسى مۇگەدەكتەردىڭ زەينەت جاسىن تومەندەتۋدى ۇسىندى.
دەپۋتات ەرلان سمايىلوۆ قازىرگى كەزدە مەملەكەت تاراپىنان مۇگەدەك ادامداردىڭ قۇقىعى مەن مۇددەسىن قورعاۋ ماقساتىندا بىرقاتار شارالاردىڭ اتقارىلىپ جاتقاندىعىن ايتتى. وكىنىشكە قاراي جۇمىس ىستەيتىن مۇگەدەك ادامداردىڭ زەينەت جاسىن تومەندەتۋ ماسەلەسى قارالماعان.
«مۇگەدەكتەردى جۇمىسپەن قامتۋ جانە ولارعا تولىققاندى جاعداي جاساۋ ماڭىزدى باسىمدىق ەكەنى داۋسىز. سونىمەن بىرگە مۇگەدەك ەرەسەك ادامداردىڭ فيزيولوگيالىق جاي-كۇيىن، دەنساۋلىق جاعدايىن دا ەسكەرۋ قاجەت. جاس وتكەن سايىن اۋرۋ كۇشەيەدى جانە مۇگەدەك ادامدارعا 63 جاسقا دەيىن جۇمىس ىستەۋ قيىنعا سوعادى. سوعان قاراماستان ولار جۇمىس ىستەۋدى جالعاستىرا بەرەدى. ويتكەنى مۇگەدەكتىك بويىنشا الاتىن جاردەماقى ماردىمسىز. سوسىن زەينەتاقىنى كوبىرەك الۋ ءۇشىن زەينەتكە شىققانعا دەيىن جۇمىس ىستەۋگە ءماجبۇر»، - دەدى سمايىلوۆ.
سونىمەن قاتار دەپۋتات مۇگەدەكتەردىڭ زەينەت جاسىن تومەندەتكەندە دەنساۋلىق جاعدايىن، دياگنوزدى، ەڭبەك سيپاتىن جانە تاعى باسقا ماسەلەلەردى ەسكەرۋ كەرەكتىگىن دە ايتىپ ءوتتى.
«بىراق ولار كوپ بالالى انالار سەكىلدى ورتاشا 55 جاستا زەينەتكە شىعۋ كەرەك. زەينەتكە شىققان مۇگەدەك ادامداردى زەينەتاقىمەن قامسىزداندىرۋ تەتىگى جەكە پىسىقتاۋدى قاجەت ەتەدى. مىسالى بۇگىنگى كۇنى مۇگەدەكتىك بويىنشا تولەنەتىن جاردەماقىنى جانە قوسىمشا زەينەتاقىنىڭ ءبىر بولىگىن الۋعا بولادى»، - دەدى ول.
"ادىرنا" ۇلتتىق پورتالى
