بۇكىل يتاليا كارانتينگە جابىلدى

3360
Adyrna.kz Telegram

9 ناۋرىزدا يتاليادا كوروناۆيرۋستان تاعى 93 ادام قايتىس بولدى. ەلدە دەرتتەن كوز جۇمعاندار سانى 463 ادامعا جەتكەن تۇستا ۇكىمەت بۇكىل يتاليادا كارانتين جاريالادى، دەپ جازادى azattyq.

دۇيسەنبىدە يتاليادا ۆيرۋس جۇقتىرعاندان 7375 ادامنان 9172 ادامعا جەتتى. 9 ناۋرىز كەشكىسىن ەل پرەمەر-ءمينيسترى دجۋزەپپە كونتە تەلەارنا ارقىلى يتاليانىڭ بۇكىل اۋماعىندا كارانتين جاريالايتىنىن مالىمدەدى.

8 ناۋرىزدا يتاليا ەلدىڭ سولتۇستىك اۋماعىن “قىزىل زونا” دەپ اتاپ، ميلان، ۆەنەتسيا، پارما، ريميني، پياچەنتسا سىندى قالاداعى 16 ميلليونداي ادامدى كارانتينگە جاپقان ەدى. ەندى بۇل قاتاڭ شارا بۇكىل ەل اۋماعىن قامتيدى.

كونتەنىڭ سوزىنشە، تۇرعىندار تەك جۇمىسقا نە وتباسىنىڭ شۇعىل شارۋالارىمەن عانا سىرتقا شىعا الادى. يتاليانىڭ باسقا ايماعىنان سولتۇستىك ايماققا بارۋعا دا تىيىم سالىندى.

“ەندى بىزدە قىزىل زونا دەگەن بولمايدى. ءبىز ەندى بۇكىل يتاليانى قورعاۋىمىز كەرەك” دەدى ول جۋرناليستەرگە.

كونتە بۇل شارانى “ۇيدەن شىقپايمىن” (“Io resto a casa”) دەپ اتاپ، حالىقتى قوعامدىق ورىندارعا بارماۋعا شاقىردى.

تەلەارنا ەفيرىندە يتاليا پرەمەرى ء“ومىر ءسۇرۋ سالتىمىز ءسال وزگەرۋى كەرەك. ءدال قازىر ۇيدەن شىقپاعانىمىز ابزال. يتاليا ءۇشىن قالاۋىمىزدان باس تارتۋىمىزعا تۋرا كەلەدى. مۇنى ءدال قازىر جاساۋىمىز ءتيىس. ول ءۇشىن وسى قاتاڭ شاراعا شىداۋىمىز كەرەك ” دەدى پرەمەر.

يتاليانىڭ بۇكىل قالاسىندا تۇنگى شارالار، ويىن-ساۋىقتاردىڭ بارلىعى توقتاتىلدى.

ەلدە ۋاقىتشا جۇرگەندەر جانە ەلگە ەندى كەلگەندەر اۋەجايدا وزدەرىنىڭ قۇجاتتارىن تەكسەرتىپ، ەلدەن شىعۋعا يا كىرۋگە رۇقسات الۋى ءتيىس.

ەلدەگى بۇكىل سپورت جارىستارى، فۋتبول ماتچتارىنىڭ ءبارى توقتاتىلدى.

9 ناۋرىزدا يتاليانىڭ بىرنەشە تۇرمەسىندە سوتتالۋشىلار كارانتينگە قارسى شۋ شىعارىپ، تۇرمەدە وتىرعان التى ادام قازا تاپتى. سوتتالۋشىلار تۇرمەگە جاقىندارىنىڭ كىرە المايتىنىنا قارسى بولعان.

الەمنىڭ باسقا ەلدەرىندەگى جاعداي

قىتايدا تاراعان Covid-19 ۆيرۋسىن الەمدە جۇقتىرعاندار سانى 111 مىڭنان اسىپ كەتتى. 3890 ادام قازا بولدى.

ۆيرۋس تاراعان قىتايدا 8 ناۋرىزدا 41 ادام دەرتكە شالدىققانى بەلگىلى بولدى. بۇل ەلدە كۇننەن-كۇنگە ۆيرۋس جۇقتىرعاندار سانى ازايىپ كەلەدى. دەگەنمەن، قىتايدا قاڭتاردىڭ باسىنان بەرى 80 700 ادام ۆيرۋس جۇقتىرىپ، 3100 ادام وپات بولدى.

ال وڭتۇستىك كورەيادا ۆيرۋس جۇقتىرعاندار 7400-دەن استى. ەلۋ ادام قازا بولدى. كورەيا بيلىگى ەلدە ۆيرۋس جۇقتىرعاندار سانى ازايىپ كەلە جاتقانىن مالىمدەدى. ماسەلەن، بۇل ەلدە 7 ناۋرىزدا 448 ۆيرۋس جۇقتىرعان تىركەلسە، 8 ناۋرىزدا 272 ادام دەرتكە شالدىققان.

يراندا ۆيرۋس جۇقتىرعاندار جەتى مىڭنان اسىپ كەتتى. 9 ناۋرىزدا ۆيرۋستان باقيلىق بولعاندار 230-دان استى.

يراندا ۆيرۋستان قازا بولعاندار اراسىندا دەپۋتاتتار مەن شەنەۋنىكتەر دە بار. 8 ناۋرىزدا تەگەراندا ۆيرۋستان كوز جۇمعان دەپۋتات فاتيم راحباردى جەرلەدى.
يراندا ۆيرۋستان قازا بولعاندار اراسىندا دەپۋتاتتار مەن شەنەۋنىكتەر دە بار. 8 ناۋرىزدا تەگەراندا ۆيرۋستان كوز جۇمعان دەپۋتات فاتيم راحباردى جەرلەدى.

فرانتسيا (1400), گەرمانيا (1100), يسپانيا (1220), ۇلىبريتانيا (320), نيدەرلاند (318), اقش (624) ەلىندە ۆيرۋس جۇقتىرعاندار سانى ءوستى.

رەسەيدە – 20 ادامنان، گرۋزيادا – 15 ادامنان، ازەربايجاندا – 9 ادامنان، بەلارۋس پەن لاتۆيادا – 6 ادامنان، ارمەنيا، مولدوۆا، ۋكراينادا ءبىر-ءبىر ادامنان ۆيرۋس تابىلدى. بۇل ەلدەردە ادام شىعىنى جوق.

قازاقستاندا قانشا ادام كارانتيندە؟

9 ناۋرىزداعى دەرەك بويىنشا، قازىر قازاقستاندا كوروناۆيرۋس تاراعان ەلدەردەن كەلگەن 3676 ادام كارانتيندە. بۇل تۋرالى قازاقستان دەنساۋلىق ساقتاۋ مينيسترلىگى حابارلادى.

قىتاي، وڭتۇستىك كورەيا جانە يراننان كەلگەن 1053 ادام، يتاليادان كەلگەن 182 ادام، گەرمانيا مەن يسپانيادان كەلگەن 2849 ادام مەديتسينالىق باقىلاۋدا. 408 ادام كارانتيننەن شىققان.

مينيسترلىكتىڭ دەرەگىنشە، باقىلاۋداعى ادامداردىڭ اناليزدەرى الماتىداعى ايقىمباەۆ اتىنداعى كارانتيندىك جانە زوونوزدى جۇقپالىلار قازاق عىلىمي ورتالىعىنا جىبەرىلگەن.

ۇكىمەتتىڭ مالىمدەۋىنشە، قازاقستاندا كوروناۆيرۋس جۇقتىرعاندار جوق. قازاقستان ۇكىمەتىنىڭ شەشىمىمەن ۆيرۋس كوپ تاراعان ەلدەردەن كەلگەندەر 14 كۇن كارانتينگە جىبەرىلەدى.

پىكىرلەر