قازاقستان ەلتاڭباسى مەن پروكۋراتۋرانىڭ بەلگىسى بار تاقتايشا پاۆلودار وبلىسى اۋىلدارىنىڭ بىرىندەگى قوقىس ۇيىندىسىنەن تابىلدى. تابىلعان زاتتار ۇيالى تەلەفون كامەراسىمەن تۇسىرىلگەن. قازىر قۇزىرلى ورگاندار مەملەكەتتىك ءرامىزدىڭ قوقىس الاڭىنان قالاي شىققانىن تەكسەرىپ جاتىر، دەپ حابارلايدى «ادىرنا» ۇلتتىق پورتالى دەرەككوزگە سىلتەپ.
ينستاگرامعا جاريالانعان ۆيدەودان اقتوعاي اۋداندىق پروكۋراتۋراسىنىڭ تاقتايشاسى قوقىستىڭ ىشىندە جاتقانىن كورسەتەدى.ال ونىڭ جانىندا ەكى ەلتاڭبا جاتىر. ونىڭ بىرەۋى بولىكتەرگە بولىنگەن، ال ەكىنشىسى ءبۇتىن كۇيىندە.
«مەن قوقىس الاڭىندامىن. مىنە پروكۋراتۋرا، بۇل ولاردىڭ قوقىسى. ءبىر قىزىعى، گەرب پوليگوندا ىستەپ جاتىر» دەيدى ۆيدەو اۆتورى قاداعالاۋ ورگانىنىڭ مەملەكەتتىك رامىزدەرگە دەگەن كوزقاراسىنا اشۋلانىپ.
بەينەجازبا جاريالانعاننان كەيىن پاۆلودار وبلىسىنىڭ پروكۋراتۋراسى بۇل زاتتاردىڭ تابىلۋىنا قىزىعۋشىلىق تانىتتى. بۇل فاكت تەكسەرىلىپ جاتىر دەپ حابارلاندى.
«وبلىستىق پروكۋراتۋرا قوقىس الاڭىنان مەملەكەتتىك رامىزدەردىڭ تابىلۋىنا قاتىستى رەسمي تەكسەرۋ جۇرگىزۋدە. سونداي-اق، KUI ماتەريالى اياسىندا پوليتسيا تەكسەرۋ جۇمىستارىن باستادى. ءمان-جايلار تەكسەرىلىپ جاتىر»، - دەپ قاداعالاۋشى ورگان اتاپ ءوتتى.
«بۇل قوقىس الاڭى، اقتوعاي اۋىلىنان ەكى شاقىرىم جەردە ورنالاسقان»، - دەدى قارشىعا اۋدانىنىڭ اكىمى ارىنوۆ.
سونىمەن قاتار، پاۆلودار وبلىسىنىڭ اقپارات جانە الەۋمەتتىك دامۋ باسقارماسى مەملەكەتتىك رامىزدەرگە مۇنداي كوزقاراستىڭ جول بەرىلمەيتىندىگىن حابارلادى.
«ەرەجەگە سايكەس مەملەكەتتىك تۋ مەن ەلتاڭبانى جويۋ، ولاردى كۇيدىرۋ، بالقىتۋ، بولشەكتەرگە 2,5 سانتيمەتردەن اسپايتىن ەتىپ كەسۋ، ءپىشىنسىز ماسساعا نەمەسە ۇنتاققا اينالدىرۋ ارقىلى جۇزەگە اسىرىلادى. بۇل ءادىس ولاردى قايتا پايدالانباس ءۇشىن قولدانىلادى. بىراق ەشقانداي جاعدايدا رامىزدەردى قوقىس پوليگونىنا تاستاۋعا بولمايدى »، دەپ ءتۇسىندىردى وبلىستىق اقپارات جانە قوعامدىق دامۋ دەپارتامەنتىنىڭ باستىعى ازامات بايتەنوۆ.
ەسكەرتۋ، رامىزدەردى دۇرىس ەمەس تۇرعىدا جويۋ، مەملەكەتتىك رامىزدەردى زاڭسىز پايدالانۋ بولىپ تابىلادى. بۇل قۇقىق بۇزۋشىلىق ءۇشىن اكىمشىلىك كودەكستىڭ 458-بابى بويىنشا 50 اەك-كە دەيىن ايىپپۇل تولەۋدى كوزدەيدى (2021 جىلعا 145 145 تەڭگە).
سونىمەن قاتار، ەگەر قۇقىق بۇزۋشىلاردىڭ ءىس-ارەكەتتەرى مەملەكەتتىك رامىزدەرگە نارازىلىق رەتىندە تانىلسا، وندا كىنالىلەرگە قىلمىستىق كودەكستىڭ 372-بابى بويىنشا 2000 اەك (2021 ج. جاعداي بويىنشا 5 834 000 تەڭگە) ايىپپۇل تۇرىندە قىلمىستىق جازا قولدانىلادى نەمەسە 2 جىلعا دەيىنگى مەرزىمگە باس بوستاندىعىنان ايىرۋ جازاسى بەرىلەدى.
«ادىرنا» ۇلتتىق پورتالى
