مەملەكەتتىك سايتتاردىڭ كەمشىلىگى مەن وسالدىعىن انىقتاپ، ونى جويۋعا كومەكتەسكەن قازاقستاندىقتارعا اقشالاي سىياقى تولەنەدى. بۇل تۋرالى "مەملەكەتتىك تەحنيكالىق قىزمەت" اق اقپاراتتىق قاۋىپسىزدىكتىڭ ۇلتتىق ۇيلەستىرۋ ورتالىعىنىڭ ديرەكتورى سەرىك حولداس مالىمدەدى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
قازاقستاندىقتار سايتتىڭ وسالدىعى تۋرالى Bug Bounty باعدارلاماسىنىڭ كومەگىمەن حابارلاي الادى.
«مۇنداي باعدارلامالار كوپتەگەن ءىرى كومپانيادا – Mail.ru, ياندەكس، Uber, Google-دا بار. ەگەر قانداي دا ءبىر مامان، حاكەر جۇيەنىڭ وسالدىعىن تاپسا، ول ونى تاپسىرىپ، اقشالاي سىياقى الا الادى. قازاقستاندا ءبىز بىرەگەي باعدارلامانى ىسكە قوستىق، مۇنداي بۇكىل الەمدە جوق. ازاماتتار بارلىق مەملەكەتتىك جۇيەدە انىقتالعان وسالدىق تۋرالى حابارلاي الادى»، - دەدى حولداس بريفينگتە.
ول ۇلتتىق بانكپەن بىرلەسىپ BugBounty باعدارلاماسىنا بارلىق بانكتى قوسۋ ماسەلەسى شەشىلىپ جاتقانىن ايتتى.
«وسال ەمەس جۇيە بولمايدى، ءتىپتى پەنتاگوننىڭ ءوزىن بۇزىپ جاتادى. بىراق قالاي دا سونى قورعاۋ پروتسەسىن ۇيىمداستىرۋ قاجەت. ماسەلەن، وتكەن اپتادا زەرتتەۋشىلەردىڭ ءبىرى بۇكىل قالانىڭ تىنىس-تىرشىلىگىن قامتاماسىز ەتۋگە اسەر ەتەتىن وسالدىقتى انىقتادى. مۇنىڭ ءوزى وسى باعدارلامانىڭ قانشالىقتى پايدالى ەكەنىن كورسەتەدى»، - دەدى ورتالىق ديرەكتورى.
