Memlekettık saittardyŋ kemşılıgı men osaldyǧyn anyqtap, ony joiuǧa kömektesken qazaqstandyqtarǧa aqşalai syiaqy tölenedı. Būl turaly "Memlekettık tehnikalyq qyzmet" AQ aqparattyq qauıpsızdıktıŋ ūlttyq üilestıru ortalyǧynyŋ direktory Serık Holdas mälımdedı, dep habarlaidy «Adyrna» ūlttyq portaly Sputnik Qazaqstan saityna sılteme jasap.
Qazaqstandyqtar saittyŋ osaldyǧy turaly Bug Bounty baǧdarlamasynyŋ kömegımen habarlai alady.
«Mūndai baǧdarlamalar köptegen ırı kompaniiada – Mail.ru, Iаndeks, Uber, Google-da bar. Eger qandai da bır maman, haker jüienıŋ osaldyǧyn tapsa, ol ony tapsyryp, aqşalai syiaqy ala alady. Qazaqstanda bız bıregei baǧdarlamany ıske qostyq, mūndai bükıl älemde joq. Azamattar barlyq memlekettık jüiede anyqtalǧan osaldyq turaly habarlai alady», - dedı Holdas brifingte.Ol Ūlttyq bankpen bırlesıp BugBounty baǧdarlamasyna barlyq banktı qosu mäselesı şeşılıp jatqanyn aitty.
«Osal emes jüie bolmaidy, tıptı pentagonnyŋ özın būzyp jatady. Bıraq qalai da sony qorǧau prosesın ūiymdastyru qajet. Mäselen, ötken aptada zertteuşılerdıŋ bırı bükıl qalanyŋ tynys-tırşılıgın qamtamasyz etuge äser etetın osaldyqty anyqtady. Mūnyŋ özı osy baǧdarlamanyŋ qanşalyqty paidaly ekenın körsetedı», - dedı ortalyq direktory.
