Koronavırýs ınfekııasyn halyq jasyryn toılarǵa baryp juqtyrýda. Bul týraly "Adyrna" ulttyq portaly Informbıýro jańalyqtar baǵdarlamasyna silteme jasap habarlaıdy.
Koronavırýstan em alyp jatqan naýqastardyń biri jýrnalıst Arman Karımov janynda jatqandardyń basym bóligi vırýsty merekelik is-sharada, otbasylyq keshterde juqtyrǵanyn aıtady. Ol tipti óziniń de qalaı ınfekııa juqtyrǵanyn biledi.
"Men qazir ortalyq klınıkalyq aýrýhanada jatyrmyn. Naýryzdan keıin aýrýhanaǵa tústim. Biraq vırýsty odan buryn juqtyrǵanmyn. Shamamen vırýsty dárihanada juqtyryp alǵan sııaqtymyn. Men jórgek alýǵa barǵanmyn. Sol kezde túri kógerip ketken er adamda kezekte turǵan. Ózin nashar sezinip turǵan edi. Meniń oıymsha sol kisi koronavırýspen aýyrǵan. Óıtkeni vırýsqa qarsy dáriler satyp aldy", - deıdi ol.
Sonymen qatar, Arman Karımov aýrýhanadaǵy qazirgi jaǵdaı máz emes ekenin jetkizdi. Merekelik is-sharalarǵa baryp, búkil otbasyn juqtyrǵandar óte kóp ekenin aıtady ol.
"Aýrýhanada adamdar jeke-jeke palatada jatyr. Biri ottegimen tynys alyp jatsa, endi biri dáriger jazyp bergen preparattardy qabyldaýyn jalǵastyrýda. Barlyq bólmeler jabyq. Bul jerde aýyryp jatqandar vırýsty eki jolmen juqtyrǵan. Birinshi joly - ózderi ártúrli keshterge, toılarǵa barǵan. Ekinshi joly - jaqyndarynan juqtyrǵan. Bul máselege mán berý kerek. Aıyppul kólemin de arttyrý qajet", - deıdi Arman Karımov.
Ol bir palatada jatqan naýqastardyń vırýsty qalaı juqtyrǵany týraly birneshe oqıǵamen bólisti.
"Ata men áje 30-50 adam jınalǵan qonys toıǵa barypty. Úsh kúnnen keıin aýyryp, jedel járdem shaqyrǵan. Qatelespesem jedel járdem kelmepti. Úsh kúnnen keıin atasy tynys jetispeýshilikten kóz jumypty. Al ájeı qazir em alyp jatyr", - deıdi ol.
Toıǵa barmasa da, barlarda qydyryp júrgen jas jigit te ata-anasyna vırýs juqtyryp, qazir ózi aýrýhanada jatqan kórinedi.
"Taǵy bir bala laýnj-barlarǵa baryp júrgen. Barlyǵy ashyq, jasyryn jumys istep jatyr deıdi. Dostarymen barǵa baramyn dep ata-anasyna jáne taǵy bir dosyna vırýs jutyrypty", - deıdi Karımov.
Aýyrǵandardyń arasynda toıǵa barǵysy kelmese de, "uıat bolady" dep búkil otbasynyń ómirin qaýipke tikkender de bar.
"Baný esimdi qyz Talǵarda jasyryn túrde ótken qurbysynyń uzatýyna barypty. Toıǵa baryp kelgennen keıin úıindegilerdiń barlyǵyna vırýs juqtyrǵan. Baný toıǵa barǵysy kelmepti. Biraq eń jaqyn qurbysy uzatylǵandyqtan, kóńilin qaldyrmaǵan", - deıdi jýrnalıst.
Naýqastardyń basym bóligi jasyryn toılarǵa, ruqsat etilmegen is-sharalarǵa, adam kóp jınalǵan jerge ózderi barǵanyn aıtyp ashynǵan jýrnalıst bulaı jalǵasa berse, jaǵdaı jaqsarmaıtynyn túsindirmek boldy.
"Bul qarqynmen shilde aıyndaǵy jaǵdaıǵa qaıtadan jetemiz. Ol kezderi máıithanalardyń ózi tolyp ketken edi. Dárigerlerge arnaıy kıimmen júrý óte qıyn. Qazir kún jylynatyn bolsa, tipti qıynǵa soǵaıyn dep tur. Sondyqtan, ózderińizdi kútińizder, vırýsty úıge tasymańyzdar. Ómirińizde bul toıdan basqa toı bolmaıtyndaı barlyq jerge bara berýdiń qajeti joq", - deıdi Arman Karımov.
