Finprom.kz تالداۋ پورتالىنىڭ زەرتتەۋلەرى كورسەتكەندەي، قازاقستاندىقتاردىڭ ءبىر بولىگى تاقىر كەدەيگە، ال ەندى ءبىر بولىگى شىلقىعان بايلارعا اينالۋدا دەپ جازادى «ادىرنا» ۇلتتىق پورتالى دەرەككوزگە سىلتەمە جاساپ.
سوڭعى جىلدارمەن سالىستىرساق، قازاقستان تۇرعىندارىنىڭ وسىعان دەيىنگى ەڭ تومەنگى كۇنكورىسپەن كۇنىن كورگەندەر سانى 20 پايىزعا ارتقان.
الىسقا بارماي-اق، بىلتىرعى پاندەميا كەزىندە-اق ەلىمىزدەگى كەدەيشىلىك كورسەتكىشى 12 پايىزعا كوتەرىلىپتى. قازاقستانداعى تابىسى ەڭ تومەن وتباسىلاردىڭ قاتارىنا قازىر 140 مىڭ 600 ادام قوسىلعان. سونىمەن قاتار الەمدەگى ەڭ باي ادامدار سانىنىڭ ءوسۋى بويىنشا ون ەلدىڭ قاتارىنا دا قازاقستان كىرىپتى. دەمەك، بايلارىمىز بايىعان ۇستىنە بايۋدا. ال بۇعان دەيىن سۇيرەتىلىپ، ولمەستىڭ كۇنىن كەشكەندەر ءسىڭىرى شىققان كەدەيگە اينالعان.
قازاقستاندا ەڭ تومەنگى كۇنكورىس تابىسى – 42 500 تەڭگە. وسى اقشامەن تاماعىن اسىراعان وتباسىلار سانى ونداعان پايىزعا كوبەيۋدە. ال مۇنداي وتباسىنىڭ باسىم بولىگى تۇركىستان وبلىسىندا تۇرادى ەكەن. بۇل جاعى تۇسىنىكتى دە. تۇركىستان وبلىسى كوپبالالى وتباسى بويىنشا ەڭ الدىڭعى ورىندا. الايدا كۇنكورىسكە بايلانىستى ۇكىمەت تاراپىنان بولىنەتىن ازىن-اۋلاق اقشامەن اسقااندى دا الداۋ مۇمكىن ەمەسى بەسەنەدەن بەلگىلى.
ال ەندى بايشىكەشتەرىمىزگە كەلەر بولساق، قازاقستان باي ادامداردىڭ كوبەيۋى بويىنشا اقش-تى باسىپ وزىپ، الەمنىڭ توپ-10 ەلىنىڭ قاتارىنا ەندى. Statista.com. اگەنتتىگىنىڭ دەرەكتەرىنە سەنسەك، ەڭ باي دەگەن ادام سانى قازاقستاندا كوبەيە تۇسكەن. 2025 جىلعا قاراي بۇل توپتىڭ وكىلدەرى 33 پايىزعا دەيىن ارتادى دەگەن بولجام دا بار.
وسى رەتتە «بايلار قايتىپ بايىپ، كەدەيلەر نە سەبەپتى كەدەيلەنە تۇسۋدە؟» دەگەن سۇراقتىڭ قۇلاعى قىلتيادى.
بۇل سۇراعىمىزعا تۇركىستان وبلىسىنىڭ تۇرعىنى اۋەلحان شونجان: «بۇل ەلدىڭ بار بايلىعىن توناپ، قوينى-قونشىن تولتىرعاندار ساعات ساناپ بايىپ جاتقانى بەلگىلى. ال كەدەيدىڭ ارمەن قاراي كەدەيلەنە ءتۇسۋى زاڭدىلىق قوي. سول كەدەيدىڭ نەسىبەسىن الگى بايشىكەشتەرىڭىز قىلعىتىپ جاتقان جوق پا؟!»،- دەپ جاۋاپ بەردى. ال وسىعان دەيىن بالا سانىنا قاراي مەملەكەتتەن جاردەماقى الىپ، كۇنىن كورىپ وتىرعان جامبىل وبلىسىنىڭ تۇرعىنى امالبەك سمانوۆ: «كەدەيلەردىڭ كوبەيۋىنە قوس وكپەدەن قىسقان قىمباتشىلىق كىنالى. بىلتىر 100 مىڭعا ءىلىنىپ-سالىنىپ ارەڭ كۇن كەشسەك، بيىل ول اقشاڭىزدىڭ 10 مىڭ تەڭگەلىك تە قۇنى قالماي بارادى. تاماق تا، كيىم دە، كوممۋنالدىق شىعىندار دا اي سايىن قىمباتتاۋدا. ال بىزدەگى تومەنگى كۇنكورىس ءۇشىن بەلگىلەنگەن 42 500 تەڭگە وزگەرىسسىز قالدى. نەگە؟ بايلاردىڭ بايۋىنا قاتىستى ءسوز شىعىنداپ تا كەرەگى جوق شىعار»،- دەپ كۇيىنەدى.
ءسىز قالاي ويلايسىز، حالقىمىزدىڭ كەدەيشىلىكتە كۇن كەشكەن بولىگى نەگە بايلاردىڭ قاتارىنا كىرە الماۋدا؟
مۇقاش مۇراتۇلى،
«ادىرنا» ۇلتتىق پورتالى.
فوتو اشىق دەرەككوزدەن الىندى.
