بقو-دا جانعالى مەكتەپ-گيمنازياسىنىڭ ديرەكتورى مەكتەپ وقۋشىسىنا وگەي اكەسى جىنىستىق سيپاتتاعى ارەكەت جاساعانىن بىلە تۇرا جاسىردى دەگەن كۇدىككە ءىلىندى. ول قىزمەتىنەن بوساتىلىپ، ءۇي قاماۋىنا الىندى، - دەپ حابارلايدى Tengrinews.kz.
قۇقىق قورعاۋ ورگاندارى وقۋ ورنىنىڭ باسشىسى قىزدىڭ وتباسىندا بولعان جاعدايدى بىلە تۇرا حابارلامادى دەپ كۇدىكتەنەدى.
وقيعا 2019 جىلى بولعان. سول كەزدە 10 جاستا بولعان مەكتەپ–گيمنازياسىنىڭ وقۋشىسىنا وگەي اكەسى جىنىستىق سيپاتتاعى ارەكەت جاساعان. ول ءۇشىن قاماۋعا الىندى. 2020 جىلى ەر ادام 20 جىلعا باس بوستاندىعىنان ايىرىلدى.
جاقىندا "مگ" رەداكتسياسىنا مەكتەپ-گيمنازيا ديرەكتورىنىڭ تۋىستارى حابارلاسىپ، ونى قاماۋعا الىنعانىن جانە جاۋاپقا تارتىلۋى مۇمكىن ەكەنىن ايتقان. تەرگەۋشىلەر مەكتەپ باسشىسى مەن مۇعالىمدەرىنەن وقۋشىعا زورلىق-زومبىلىق جاسالعانىن ءبىلدى جانە ول تۋرالى قۇزىرلى ورگاندارعا حابارلامادى دەپ كۇدىكتەنەدى.
كۇدىكتىنىڭ ادۆوكاتى ايسلۋ بياليەۆانىڭ ايتۋىنشا، ايىپتاۋ تەك جابىرلەنۋشى قىزدىڭ سوزىنە نەگىزدەلگەن جانە كەز كەلگەن مۇعالىم بۇل جاعدايعا تاپ بولۋى مۇمكىن.
"مەكتەپ ديرەكتورىن دەمالىس كەزىندە مەكتەپتەن تىس ۋاقىتتا جاسالعان قىلمىس ءۇشىن جاۋاپقا تارتقالى جاتىر. تەرگەۋ بارىسىندا قىز 2019 جىلدىڭ ساۋىرىندە جاڭعالى مەكتەپ-گيمنازياسىنىڭ مۇعالىمدەرىنە اناسىنىڭ ازاماتتىق نەكەدەگى كۇيەۋى قىسىم كورسەتكەنىن حابارلاعانىن ايتتى. پوليتسيا ديرەكتور مەن مەكتەپ-گيمنازيانىڭ تاعى ءتورت مۇعالىمىنەن جاۋاپ الدى. ولار قىزدىڭ سوزدەرىن تولىعىمەن جوققا شىعاردى. ولار ايعاقتارىن سوتتا دا راستادى", - دەدى ايسلۋ بياليەۆا.
