قر پرەمەر-ءمينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا ەلىمىزدەگى سانيتارلىق-ەپيدەميولوگيالىق جاعداي قارالدى. قازىرگى جاعداي، حالىقتى ۆاكتسيناتسيالاۋ بارىسى جانە مەملەكەت باسشىسى قاسىم-جومارت توقاەۆتىڭ تاپسىرمالارىن ورىنداۋ بويىنشا قابىلدانىپ جاتقان شارالار تۋرالى دەنساۋلىق ساقتاۋ ءمينيسترى الەكسەي تسوي، الماتى وبلىسىنىڭ اكىمى اماندىق باتالوۆ، اتىراۋ وبلىسىنىڭ اكىمى ماحامبەت دوسمۇحامبەتوۆ، اقتوبە وبلىسىنىڭ اكىمى وڭداسىن ورازالين باياندادى. بۇل تۋرالى “ادىرنا” ۇلتتىق پورتالى primeminister.kz-كە سىلتەمە جاساپ حابارلايدى.
رەسپۋبليكا بويىنشا ۆيرۋستىڭ رەپرودۋكتيۆتلىك كورسەتكىشى 1,16 قۇرايدى. ينفەكتسيالىق توسەك-ورىندار جۇكتەمەسى – 36%، رەانيماتسيالىق توسەك-ورىندار جۇكتەمەسى – 22%. قازىرگى ۋاقىتتا COVID-19 تارالۋ قارقىنى بويىنشا «قىزىل ايماقتا» – نۇر-سۇلتان جانە الماتى قالالارى، اتىراۋ، اقتوبە، الماتى جانە باتىس قازاقستان وبلىستارى، «سارى ايماقتا» – شىمكەنت قالاسى جانە قاراعاندى وبلىسى. بارلىق قالعان وڭىرلەر «جاسىل ايماقتا». پرەمەر-مينيستر ۇكىمەتتىڭ سىرقاتتانۋشىلىق دەڭگەيىن تومەندەتۋ مەن ۆاكتسينا العانداردىڭ سانىن ارتتىرۋ جونىندە جەدەل شارالار قابىلداپ جاتقانىن اتاپ ءوتتى.
بيىلعى ءساۋىر ايىنان باستاپ وڭىرلەردە اي سايىن 2 ملن ادامدى ۆاكتسيناتسيالاۋ قامتاماسىز ەتىلەدى. دەنساۋلىق ساقتاۋ مينيسترلىگى ۆاكتسيناتسيالاۋ بويىنشا ناقتى جوسپار ازىرلەدى.
«قىركۇيەك ايىندا ۆاكتسيناتسيالاۋعا جاتاتىن 10 ملن ادامعا ۆاكتسينا سالۋدى اياقتاۋدى جوسپارلاپ وتىرمىز. سودان كەيىن ۇجىمدىق يممۋنيتەتتىڭ جيناقتاۋشى اسەرى كۇتىلەدى»، – دەدى ا.مامين.
ۇكىمەت باسشىسى دەنساۋلىق ساقتاۋ جۇيەسى دارىلىك زاتتار مەن مەديتسينالىق بۇيىمداردىڭ قاجەتتى كولەمىمەن تولىق قامتاماسىز ەتىلگەنىن اتاپ ءوتتى. اۋرۋحانالاردا ءدارى-دارمەكتەردىڭ ءبىر ايلىق قورى بار، ال «سق «فارماتسيا» قويمالارىندا جانە ءدارىحانالاردا 2 ايلىق قور جاسالدى. سونىمەن قاتار بارلىق وڭىرلەردە ءدارى-دارمەكتەر، جەكە قورعانىس قۇرالدارى مەن شپريتستەرى بار 3 ايلىق تۇراقتاندىرۋ قورلارى قۇرىلدى.
«جالپى، مەملەكەت باسشىسى قاسىم-جومارت كەمەلۇلى توقاەۆتىڭ بارلىق تاپسىرمالارىن ورىنداۋ بويىنشا جۇيەلى جۇمىس جۇرگىزىلۋدە»، – دەدى ا.مامين.
پرەمەر-مينيستر دەنساۋلىق ساقتاۋ مينيسترلىگىنە، اكىمدىكتەرگە «قىزىل ايماقتاعى» وڭىرلەردە ۆاكتسينا الاتىنداردىڭ سانىن ارتتىرۋ بويىنشا شارالار قابىلداۋدى جانە قابىلدانعان جوسپارعا سايكەس ۆاكتسينانى جەتكىزۋدى قامتاماسىز ەتۋدى تاپسىردى. اقپارات جانە قوعامدىق دامۋ مينيسترلىگىنە دەنساۋلىق ساقتاۋ مينيسترلىگىمەن، اكىمدىكتەرمەن بىرلەسىپ ۆاكتسيناتسيالاۋدىڭ ماڭىزدىلىعى تۋرالى اقپاراتتىق-ءتۇسىندىرۋ جۇمىستارىن كەڭىنەن جۇرگىزۋ تاپسىرىلدى.
دەنساۋلىق ساقتاۋ، تسيفرلاندىرۋ، ىشكى ىستەر مينيسترلىكتەرىنە، «اتامەكەن» ۇكپ، وڭىرلەردىڭ اكىمدىكتەرىنە وسى جىلدىڭ ءساۋىر ايىنىڭ سوڭىنا دەيىن بيزنەس سۋبەكتىلەرىنىڭ قىزمەتىن قالپىنا كەلتىرۋ جانە ەپيدەمياعا قارسى شارالاردى جۇرگىزۋ ءۇشىن «ادامداردىڭ شوعىرلانۋ ورىندارىن انىقتاۋ كارتالارىن» ەنگىزۋ مەن ءموبيلدى مونيتورينگتەۋ توپتارىنىڭ تيىمدىلىگىن جاقسارتۋ ماقساتىندا بارلىق وڭىرلەرگە «Ashyq» جوباسىن كەزەڭ-كەزەڭىمەن ەنگىزۋ تاپسىرىلدى.
