سارايىندا قايتىس بولعان اعاسىنىڭ دەنەسىن ۇزاق ۋاقىت بويى جاسىرعان اتىراۋ وبلىسى، ماحامبەت اۋدانى، تاڭداي اۋىلىنىڭ مۇعالىمىنە قاتىستى قىلمىستىق ءىس قىلمىس قۇرامىنىڭ بولماۋىنا بايلانىستى توقتاتىلدى، - دەپ حابارلايدى "اق جايىق".
ەسكە سالايىق، بيىل قاڭتاردا تاڭداي اۋىلىندا 82 جاستاعى تۇرعىن ساعىنعالي اقبەرليەۆتىڭ دەنەسى تابىلعان بولاتىن. ەر ادام قارىنداسىمەن بىرگە تۇرعان، ول مەكتەپتە مۇعالىم.
اۋىل تۇرعىندارىنىڭ سوزىنشە، سوڭعى ۋاقىتتارى ەر ادامدى ەشكىم كورمەگەن، ءسويتىپ ونىڭ تۋىستارى الاڭداي باستاعان. ارتىنشا ايەل ادام بىرنەشە اي بويى اعاسىنىڭ دەنەسىن ءۇيدىڭ سارايىندا جاسىرعانى انىقتالدى. ونىڭ مۇنداي ارەكەتكە نە ءۇشىن بارعانى بەلگىسىز.
الەۋمەتتىك جەلىدە ايەل ادام اعاسىن بىلتىر جازدا ءولتىرىپ، ارتىنشا دەنەسىن بولشەكتەپ، ۇلكەن سومكەگە جاسىرىپ قويعانى تۋرالى اقپارات تارادى. تەرگەۋ ۋاقىتىندا ايەل ادام جۇمىستان بوساتىلدى.
الايدا زەينەتكەردى بىرەۋ ولتىرگەنى راستالمادى. ساراپتاما ەر ادام ءوزى قايتىس بولعانىن كورسەتكەن.
ء"ىس توقتاتىلعانىن بىلەمىز. ونىڭ جۇمىسقا قايتا كەلۋىنە بايلانىستى - ءبىز اۋداندىق پروكۋراتۋرادان جاۋاپ كۇتەمىز. بۇعان قاتىستى باسقا ەشتەڭە ايتا المايمىز", - دەدى احمەدياروۆ اتىنداعى ورتا مەكتەپ ديرەكتورى سەرىك قويباقوۆ.
الايدا اتا-انالار مۇعالىمنىڭ مەكتەپتە جۇمىس ىستەۋىنە قارسى. 206 ادام باقساي اۋىلدىق وكرۋگىنە، اۋدان پروكۋرورىنا، وبلىستىق ءبىلىم باسقارماسى مەن Nur Otan-نىڭ بولىمشەسىنە ءوتىنىش جازعان.
"ونىڭ نەلىكتەن اعاسىنىڭ دەنەسىن تالاي ۋاقىت جاسىرىپ، ونى كورمەگەنىن ايتقانى تۇسىنىكسىز. ونداي ادام مەكتەپكە ورالعانىنا جانە بالالارىمىزدى وقىتقانىنا قارسىمىز. ەگەر جەرگىلىكتى بيلىك ءوتىنىشىمىزدى قاراستىرماسا، پرەزيدەنت پەن ءبىلىم مينيسترىنە جۇگىنەمىز. ەگەر ول جۇمىسىن جالعاستىرسا، كەيبىر اتا-انا بالاسىن مەكتەپكە اپارماۋعا دايىن", - دەلىنگەن اۋىل تۇرعىندارىنىڭ وتىنىشىندە.
