قۇرمەتتى قازاقستاندىقتار، سىزدەرگە وسىدان ەكى جىل بۇرىن قازاقستان بويىنشا ۇلكەن رەزونانس تۋدىرعان وقيعادان جاپا شەگۋشىلەر ۇندەۋ جاساپ وتىرمىز!
ناقتى ايتقاندا 2019 جىلى ءبىز - «كاسپي بانك» قىزمەتكەرى بولعان رۋسلان سەكسەمباەۆقا الدانىپ، سان سوعىپ قالعان جۇزگە جۋىق پاۆلودارلىقتارمىز. ول كەزدە ءبارىڭىز بىلەسىزدەر ونى ۇستاۋ ءۇشىن بانك ون ميلليون تەڭگە سىياقى دا جاريالاعان ەدى. سوندا ءبىز الاياقتىڭ ۇستالعانىنا دا قۋانعان بولاتىنبىز.
قازىرگى تاڭدا ەڭكەيگەن قارتتان، ەڭبەكتەگەن سابيگە دەيىن بىلەتىن «كاسپي بانك» باسشىلىعى بۇكىل جاپا شەگۋشىلەردىڭ قاراجاتىن قايتارىپ بەرەمىز دەگەن ۋادەسىندە ءىشىنارا تۇردى دەۋگە بولادى. ءىستى تەرگەۋ بارىسىندا رۋسلان سەكسەمباەۆتىڭ بارلىق ايلا-شارعىلاردى قۋلىقپەن اتقانعاندىعى تولىق دالەلدەندى. ءبىرىنشى سوت ينستانتسياسى دا ونى كىنالى دەپ ۇكىم شىعارىپ، توعىز جىلعا باس بوستاندىعىن ايىرىپ، بارلىق شىعىنداردى وتەۋگە مىندەتتەدى.
الايدا رۋسلان سەكسەمباەۆ سوت ۇكىمىمەن كەلىسپەي جۇزگە تارتا ادامدى وعان جالا جاۋىپ وتىر دەگەن جەلەۋمەن ءىستى قايتا قاراۋعا شاعىم تۇسىرگەن. بۇگىنگى تاڭدا ءىس اپپەلياتسيالىق سوتتا قارالۋ ۇستىندە. ءبىرىنشى تىڭداۋلار ءوتتى. جانە سودان كەيىن ءبىز رۋسلان سەكسەمباەۆتىڭ ەشقانداي وكىنىپ، قانشاما ادامنىڭ قاراجاتىن قولدى قىلىپ، قانشاما ماتەريالدىق، مورالدىق، ءتىپتى دەنساۋلىقتارىنا زيان كەلتىرگەندىگىن تۇسىنبەي وتىرعاندىعىن سەزىندىك.
ارامىزدا ءتىپتى سول كەزدە جۇكتى بولىپ، وسىنداي سۇمدىق جاعدايعا تاپ بولعانىن ەستىگەن سوڭ، سترەسس سالدارىنان ىشىندەگى بالاسى مەرزىمىنەن ەرتە تۋىلىپ، مۇگەدەك تە بولىپ قالعان ايەل بار. الاياقتىڭ وسىنداي سۇمدىق جاعدايلاردىڭ ءوزى ويلاندىرماعانى، جانە ءتىپتى ەشقانداي اياۋشىلىق سەزىم تۋدىرماعانى ءبىزدى اتالمىش قادامعا بارۋعا يتەرمەلەۋدە.
ۇندەۋىمىزگە قولداۋ كورسەتۋ ارقىلى جاپا شەگۋشىلەردىڭ جان ايقايى، قينالىسى مەن كۇدىگى سەيىلىپ اپپەلياتسيالىق سوت بارىنشا ءادىل شەشىم شىعارادى دەگەن ويدامىز. سىزدەردەن قولداۋ كۇتەمىز!
دايىنداعان: وڭعار قابدەن،
«ادىرنا» ۇلتتىق پورتالى
