ءشاربانۋ بەيسەنوۆانىڭ جاڭا كىتابى جارىققا شىقتى

7467
Adyrna.kz Telegram

ءشاربانۋ بەيسەنوۆانىڭ جاڭا كىتابى جارىققا شىقتى. بۇل تۋرالى ۇلى ماۋلەن اشىمباەۆ ءوز Facebook پاراقشاسىندا جاريالادى. 

“انام، جازۋشى ءشاربانۋ بەيسەنوۆانىڭ «ۇلى دالا ارۋلارى» دەگەن سەريامەن جارىق كورگەن ەڭبەكتەرى كوپشىلىككە بەلگىلى. وسىعان دەيىن «سۇيىنبيكە»، «بوزوق ارۋى» اتتى تۋىندىلارى باسىلىپ شىققان ەدى. بۇگىن اتالعان سەريا اياسىندا «ۇرپاعىنا ۇران بولعان انالار» اتتى ءۇشىنشى كىتاپ قالىڭ وقىرمانعا جول تارتتى.

بۇل ەڭبەكتە تاريحىمىزدا ەسىمدەرى ەرەكشە اتالاتىن اياۋلى انالارىمىز بەن ارۋ قىزدارىمىزدىڭ ۇلتقا ۇلگى، ۇرپاققا ونەگە بولاتىن تاعىلىمدارى جانە ەلدىك مۇددە جولىنداعى يگىلىكتى ىستەرى كەڭىنەن قامتىلىپ جازىلعان. سونىڭ ىشىندە بورتە حانىم، قىزاي، اباق، قارقابات انالارىمىز تۋرالى قۇندى دەرەكتەر كەلتىرىلگەن. ەلدىك ىستەرگە ارالاسىپ، وتباسىنىڭ عانا ەمەس، تۇتاس ۇلتتىڭ ۇيىتقىسى بولا بىلگەن ءرابيا سۇلتان بەگىم، جاعان بيكە حانىم، بوپاي حانىم سياقتى تاريحي تۇلعالارىمىز دا نازاردان تىس قالماعان.

كىتاپتىڭ العىسوزىندە ايتىلعانداي، «ۇلى دالا ارۋلارى» سەرياسىمەن جازىلعان ەڭبەكتەردە تاريحىمىزداعى اڭىز دا ابىز انالارىمىزدىڭ ءبارى قامتىلماعانى انىق. سوندىقتان الداعى ۋاقىتتا بۇل باعىتتاعى جۇمىستار ءالى دە جالعاسادى دەپ سەنەمىز. ويتكەنى مۇنداي تۋىندىلار – ۇلتتىڭ شەجىرەسىنەن سىر شەرتەتىن تاريح قانا ەمەس، جاس بۋىنعا ايتار وسيەتى مول قىمبات قازىنا. قازىرگىدەي اقپاراتتار زامانىندا ۇلتتىق قۇندىلىقتارىمىزدى دارىپتەۋ تۇرعىسىنان دا ۇتىمدى دۇنيە ەكەنى ءسوزسىز.

جاڭا كىتاپتى كوپشىلىككە تانىستىرۋ ءراسىمى قازاقستان جازۋشىلار وداعىنىڭ نۇر-سۇلتان قالالىق فيليالىندا ءوتتى. سول جەردە تۇرسىن جۇرتباي، ساۋىتبەك ابدراحمانوۆ، جانبولات اۋپباەۆ اعالارىمىز جانە باسقا دا قالامگەرلەر ءسوز سويلەپ، ەڭبەكتىڭ الداعى جالعاسى جونىندە ءوز ۇسىنىستارىن ءبىلدىردى. وسى رەتتە تۋىندىنىڭ تۇساۋكەسەر ءراسىمىن ۇيىمداستىرعان جازۋشىلار وداعىنىڭ ەلوردالىق فيليالىنا، ونىڭ باسشىسى داۋلەتكەرەي كاپۇلى باۋىرىمىزعا، الىبەك اسقاروۆ اعامىزعا جانە وسى ەڭبەكتىڭ جارىق كورۋىنە اتسالىسقان بارشا ازاماتتارعا العىسىمدى بىلدىرەمىن.

اسىل تەكتى ءازيز انالارىمىز جايىنداعى جاڭا كىتاپتىڭ وقىرمانى كوپ بولسىن”.

پىكىرلەر