Shárbaný Beısenovanyń jańa kitaby jaryqqa shyqty. Bul týraly uly Máýlen Áshimbaev óz Facebook paraqshasynda jarııalady.
“Anam, jazýshy Shárbaný Beısenovanyń «Uly dala arýlary» degen serııamen jaryq kórgen eńbekteri kópshilikke belgili. Osyǵan deıin «Súıinbıke», «Bozoq arýy» atty týyndylary basylyp shyqqan edi. Búgin atalǵan serııa aıasynda «Urpaǵyna uran bolǵan analar» atty úshinshi kitap qalyń oqyrmanǵa jol tartty.
Bul eńbekte tarıhymyzda esimderi erekshe atalatyn aıaýly analarymyz ben arý qyzdarymyzdyń ultqa úlgi, urpaqqa ónege bolatyn taǵylymdary jáne eldik múdde jolyndaǵy ıgilikti isteri keńinen qamtylyp jazylǵan. Sonyń ishinde Bórte hanym, Qyzaı, Abaq, Qarqabat analarymyz týraly qundy derekter keltirilgen. Eldik isterge aralasyp, otbasynyń ǵana emes, tutas ulttyń uıytqysy bola bilgen Rábııa Sultan begim, Jaǵan bıke hanym, Bopaı hanym sııaqty tarıhı tulǵalarymyz da nazardan tys qalmaǵan.
Kitaptyń alǵysózinde aıtylǵandaı, «Uly dala arýlary» serııasymen jazylǵan eńbekterde tarıhymyzdaǵy ańyz da abyz analarymyzdyń bári qamtylmaǵany anyq. Sondyqtan aldaǵy ýaqytta bul baǵyttaǵy jumystar áli de jalǵasady dep senemiz. Óıtkeni mundaı týyndylar – ulttyń shejiresinen syr shertetin tarıh qana emes, jas býynǵa aıtar ósıeti mol qymbat qazyna. Qazirgideı aqparattar zamanynda ulttyq qundylyqtarymyzdy dáripteý turǵysynan da utymdy dúnıe ekeni sózsiz.
Jańa kitapty kópshilikke tanystyrý rásimi Qazaqstan Jazýshylar odaǵynyń Nur-Sultan qalalyq fılıalynda ótti. Sol jerde Tursyn Jurtbaı, Saýytbek Abdrahmanov, Janbolat Aýpbaev aǵalarymyz jáne basqa da qalamgerler sóz sóılep, eńbektiń aldaǵy jalǵasy jóninde óz usynystaryn bildirdi. Osy rette týyndynyń tusaýkeser rásimin uıymdastyrǵan Jazýshylar odaǵynyń elordalyq fılıalyna, onyń basshysy Dáýletkereı Kápuly baýyrymyzǵa, Álibek Asqarov aǵamyzǵa jáne osy eńbektiń jaryq kórýine atsalysqan barsha azamattarǵa alǵysymdy bildiremin.
Asyl tekti ázız analarymyz jaıyndaǵy jańa kitaptyń oqyrmany kóp bolsyn”.
