اتىراۋدا اشىلعان جۇقپالى اۋرۋلار اۋرۋحاناسى العاشقى پاتسيەنتتەرىن قابىلدادى

1468
Adyrna.kz Telegram

وبلىستىق №2 ينفەكتسيالىق اۋرۋحاناسىنان كوروناۆيرۋس ىندەتىن جۇقتىرعان 20 ناۋقاس "جەدەل جاردەممەن" تاسىمالدانىپ، ەمىن وسى نىساندا جالعاستىرادى.

ءارى قاراي ناۋقاستاردى قابىلداۋ جۇمىستارى جۇرگىزىلەدى. وعان دەيىن وبلىس اكىمىنىڭ ورىنباسارى باقىتگۇل حامەنوۆا مەديتسينالىق نىساندى ارالاپ، ناۋقاستاردى ەمدەۋدەگى دايىندىق جۇمىستارىمەن تانىستى.

بىلتىر NCOC كومپانياسىنىڭ الەۋمەتتىك جانە ينفراقۇرىلىمدىق جوبالارى شەڭبەرىندە سالىنعان مەديتسينالىق نىسان وبلىستىق №2 ينفەكتسيالىق اۋرۋحانانىڭ بولىمشەسى سانالادى. وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆتىڭ ايتۋىنشا، 200 ورىندىق مودۋلدىك تيپتەگى اۋرۋحانا 4 بلوكقا بولىنگەن. ونىڭ 180-ءى ستاتسيونارلىق توسەككە جانە 20-سى رەانيماتسيالىق كەرەۋەت پەن قارقىندى تەراپياعا ارنالعان.

اۋرۋحانا قۇرىلىسى ينفەكتسيالىق باقىلاۋدىڭ بارلىق تالاپتارىنا ساي جاساقتالعان. مۇندا دياگنوستيكا جانە ەمدەۋ ءۇشىن زاماناۋي مەديتسينالىق جابدىقتارمەن – كومپيۋتەرلىك توموگرافيامەن، ساندىق رەنتگەن، مەديتسينالىق گازدار جۇيەسىمەن، ۋدز، ەكگ، وكپەنى جاساندى جەلدەتۋ جانە باسقا دا  اپپاراتارمەن قامتىلعان. سونداي-اق، قاۋىپسىزدىك دەڭگەيى جوعارى اقىلدى جەلدەتۋ جۇيەسى ورناتىلعان. ءاربىر پالاتاداعى توسەك-ورىننىڭ ارقايسىسىندا مەدبيكەنى شاقىرۋ تۇيمەسى بار. ال، وقشاۋلانعان بوكستارعا ارنايى چيپتەر ارقىلى كىرۋگە بولادى. بۇيرەك جەتكىلىكسىزدىگى بار ناۋقاستار ءۇشىن دە گەمودياليز جاساۋ قىزمەتى قولعا الىندى، – دەدى اسحان مارحابايۇلى.

بۇگىندە وبلىستىق №2 ينفەكتسيالىق اۋرۋحانادا كوروناۆيرۋس ىندەتىن جۇقتىرعان 84 ناۋقاس ەم قابىلداۋدا. ونىڭ 8-ءى جانساقتاۋ بولىمىندە جاتىر.

ناۋقاستاردىڭ  ەڭ ۇلكەنى – 92 جاستا، ال ەڭ كىشىسى – 30-دا. ولاردىڭ بۇگىنگى جاعدايلارى بىرقالىپتى. ناۋقاستاردىڭ قاتارىندا 3 جۇكتى ايەل دە بار. بۇعان دەيىن كوروناۆيرۋسپەن مەكتەپ جاسىنا دەيىنگى 2 بالا اۋىرىپ، ەمدەلىپ شىعارىلدى. ال، قازىر بالالار اراسىندا اۋرۋشاڭدىق جوق.  بۇگىن ەم الىپ جاتقان پاتسيەنتتەردىڭ 20-سىن مودۋلدىك تيپتەگى جاڭا اۋرۋحاناعا تاسىمالدايمىز. ولار قالعان ەمدەرىن وسى مەديتسينالىق نىساندا جالعاستىرادى. كوروناۆيرۋس ىندەتىن جۇقتىرعان باسقا ناۋقاستار بۇگىننەن باستاپ وسى ورىندا قابىلدانادى. سونداي-اق، بۇل اۋرۋحانادا پوليمەرازالىق تىزبەكتى رەاكتسياعا (پتر) تالداۋ جاسايتىن ورتالىقتاندىرىلعان ۆيرۋسولوگيالىق زەرتحانا جۇمىس جاسايدى. مۇندا تاۋلىگىنە 3000 ناۋقاستىڭ تالدامالارىن تەكسەرۋگە مۇمكىندىك بار. بۇعان دەيىن مەملەكەتتىك پتر زەرتحاناسى گەولوگ ەمحاناسىندا جۇمىس جاسادى. بۇگىندە بۇل زەرتحانا وسى نىسانداعى قىزمەتكە بىرىكتىرىلۋدە، – دەدى وبلىستىق №2 ينفەكتسيالىق اۋرۋحانا ديرەكتورىنىڭ ەمدەۋ ءىسى جونىندەگى ورىنباسارى ناديا ەرعاليەۆا.

بۇگىندە مەديتسينالىق مەكەمە ناۋقاستاردى قابىلداۋعا تولىق دايىن. وبلىس اكىمىنىڭ ورىنباسارى باقىتگۇل حامەنوۆا جاسالعان جۇمىستارعا وڭ باعا بەردى.

بۇگىن وڭىردە مەملەكەت باسشىسىنىڭ تاپسىرماسىمەن، وبلىس اكىمىنىڭ باستاماسىمەن ءىرى مۇناي كومپانياسىنىڭ دەمەۋشىلىگىمەن سالىنعان جاڭا مەديتسينالىق نىساننىڭ ەسىگىن اشىپ، ناۋقاستاردى قابىلداۋعا دايىندىق جۇمىستارىمەن تانىسىپ شىقتىم. اۋرۋحانا جوعارى دەڭگەيدەگى ارنايى تازالىق جۇمىستارىمەن قامتىلعان. مۇندا دارىگەرلەر اۋىسىم بويى ارنايى قورعانىش كيىمدەرىمەن قىزمەت ەتەدى. مەن جارتى ساعات قانا وسى كيىممەن جۇرگەنىمدە بۇلايشا قىزمەت ەتۋدىڭ اۋىرلىعىن جەتە سەزىندىم. بىزدە ءاربىر دارىگەر ءبىر جىل بويى وتباسىنان جىراقتا، ءار ناۋقاستىڭ ءومىرى ءۇشىن وسىلاي ءجۇرىپ كۇرەستى. ولاردىڭ ەڭبەگى ەرلىكپەن پارا-پار. سوندىقتان، ءبىز اقحالاتتى ابزال جانداردىڭ الدىندا ەرەكشە باس يەمىز. ويتكەنى، دارىگەرلەردىڭ باتىرلىققا ءتان ەڭبەگى ەشقاشان ۇمىتىلمايدى. بۇگىن وسى اۋرۋحاناعا ەم ىزدەي كەلگەن ءاربىر ناۋقاستىڭ دەرتىنە شيپا تاۋىپ، جانۇياسىمەن امان-ەسەن قاۋىشۋىنا تىلەكتەسپىز. بۇل جەردە مەديتسينالىق قىزمەت بارلىق زاماناۋي تالاپتارعا ساي جۇرگىزىلەدى. العاشقى تولقىنداعىداي قيىندىقتار بولمايدى دەپ سەنەمىن، – دەدى باقىتگۇل قايىرجانقىزى.

ايتا كەتەيىك، جاڭا اۋرۋحانادا ناۋقاستارعا الدىن الا تولىق دايىندىق كۋرستارىنان وتكەن 15 دارىگەر-ينفەكتسيونيست، رەانيماتولوگ قىزمەت ەتەدى.​

پىكىرلەر