وبلىس اكىمى وڭداسىن ورازالين COVID-19 اۋرۋىنا شالدىققان ناۋقاستار جاتقان فتيزيوپۋلمونولوگيالىق ورتالىقتىڭ قىزمەتىمەن تانىسىپ، مەديتسينالىق مەكەمەنىڭ ماتەريالدىق-تەحنيكالىق بازاسىن قاراپ شىقتى.
فتيزيوپۋلمونولوگيالىق ورتالىق 500 توسەك-ورىنعا ەسەپتەلگەن، سونىڭ ىشىندە 75 رەانيماتسيالىق ورىن كوروناۆيرۋس ينفەكتسياسىمەن اۋىراتىندارعا كومەك كورسەتۋگە ارنالعان.
وبلىس اكىمى قابىلداۋ بولمەسىن، رەانيماتسيالىق، رەنتگەن-دياگنوستيكالىق بولىمدەردى قاراپ شىقتى.
فتيزيوپۋلمونولوگيالىق ورتالىقتىڭ باس دارىگەرى ەرلان ءتاتىموۆ ناۋقاستار تۇسكەن كەزدە پتر تەست تاپسىرىپ، ناتيجەسى ءبىر ساعاتتىڭ ىشىندە بەرىلەتىنىن ايتتى. سونداي-اق، قابىلداۋ بولمەسىندە رەنتگەندىك زەرتتەۋ جاسالادى، بۇل دياگنوز قويىپ، سوعان ساي ەم تاعايىنداۋدى جىلدامداتادى.
مەكەمە تولىعىمەن جوعارى بىلىكتى مەديتسينالىق كادرلارمەن قامتاماسىز ەتىلگەن: ورتالىقتىڭ 11 قىزمەتكەرى قوسىمشا ينفەكتسيونيست، 11 قىزمەتكەرى پۋلمونولوگ ماماندىقتارىنا وقىتىلدى. جۇقپالى اۋرۋلار ءبولىمىنىڭ جۇمىسىنا انگيوحيرۋرگتار، كارديولوگتار، ەندوكرينولوگتار، نەۆرولوگتار مەن حيرۋرگتار، بارلىعى 24 تار اۋقىمدى مامان تارتىلعان.
ورتالىقتا دارىلىك زاتتاردىڭ ەكى ايلىق قورى جاسالىپ، ماتەريالدىق-تەحنيكانى نىعايتۋ شارالارى قابىلدانعان: وكپەنى جاساندى جەلدەتەتىن 75 اپپارات، بيوحيميالىق گەموتولوگيالىق تالداعىش، رەنتگەن-دياگنوستيكالىق قوندىرعى، كومپيۋتەرلىك توموگراف، فۋنكتسيونالدى كەرەۋەتتەر جانە ت.ب. كوپتەگەن قۇرىلعىلار بار. رەانيماتسيا بولىمىنە كوسمەتيكالىق جوندەۋ جۇرگىزىلىپ، قۋاتى مينۋتىنا 600 ل بولاتىن وتتەكتى-كونتسەنتراتتى ستانسا ورناتىلعان. بۇل ماقساتقا بىلتىر بيۋدجەتتەن 618 ملن تەڭگە بولىنگەن بولاتىن.
ناۋقاستارعا كىرىپ-شىققان وڭداسىن ورازالين اقتوبەلىكتەردىڭ حال-جاعدايلارىن سۇراپ، تەز ساۋىعىپ كەتۋلەرىن تىلەدى.
«ءوڭىردىڭ ەپيدەميولوگيالىق جاعدايى ايتارلىقتاي كۇردەلى. ارينە، ءبىز ءتيىستى شارالاردى قابىلداپ جاتىرمىز. ەڭ باستىسى – پاندەميانىڭ ءبىرىنشى تولقىنىنداعى قاتەلىكتەردى قايتالاماۋىمىز كەرەك. ەمدەۋ مەكەمەلەرىنىڭ ماتەريالدىق-تەحنيكالىق بازالارىن نىعايتۋعا از قاراجات اۋدارىلعان جوق، دارىلىك زاتتارمەن قامتاماسىز ەتۋ ماسەلەسى شەشىلىپ قويدى. مەن سىزدەردىڭ كاسىپقويلىقتارىڭىز بەن جانقيارلىقتارىڭىزعا ءشۇبا كەلتىرمەيمىن، وكىنىشكە قاراي ءبارى دە ءوڭىر تۇرعىندارىنا بايلانىستى. ەپيدەميولوگيالىق جاعدايدىڭ ناشارلاۋى اقتوبەلىكتەردىڭ قاۋىپسىزدىك شارالارىن ساقتاماۋىنىڭ ناتيجەسى بولىپ تابىلادى. كوپ نارسە بىزگە بايلانىستى»، - دەپ اتاپ ءوتتى وبلىس اكىمى.
دەنساۋلىق ساقتاۋ باسقارماسىنىڭ باسشىسى رۇستەم يساەۆ وڭداسىن ورازالينگە اعىمداعى جاعداي تۋرالى باياندادى. سونداي-اق، وڭىردە كوروناۆيرۋس اۋرۋىنا شالدىققان ناۋقاستارعا كومەك كورسەتەتىن 41 مەديتسينالىق مەكەمە، سونىڭ ىشىندە 15 ينفەكتسيالىق ستاتسيونار، 21 العاشقى مەديتسينالىق-سانيتارلىق كومەك كورسەتۋ ۇيىمى، رەزەرۆتە بەس ستاتسيونار بار.
مەديتسينالىق مەكەمەلەردە تاۋلىك بويى جۇمىس جاسايتىن 3063 توسەك ورىن بار. سونىڭ ىشىندە 894-ءى اۋداندىق بولسا، ونىڭ 465-ءى اقتوبە قالاسىنداعى پروۆيزورلىق ستاتسيونارلاردا، 180-ءى وبلىس اۋداندارىندا.
قازىرگى تاڭدا ينفەكتسيالىق ستاتسيونارلاردا 388 ادام ەم الىپ جاتىر. 36 ادام كارانتين ستاتسيونارىندا. اقتوبە، حرومتاۋ، قاندىاعاش پەن شالقار قالالارىندا 19 توموگرافيا كابينەتى جۇمىس جاسايدى، 10 زەرتحانادا پتر دياگنوستيكاسى جاسالادى. ولاردىڭ قۋاتى تاۋلىگىنە 5380 تالداۋ جۇرگىزۋگە مۇمكىندىك بەرەدى.
ۆاكتسينا ەگۋ ناۋقانى باسىنان بەرى وبلىسقا 17800 دوزا اكەلىنىپ، 7460 اقتوبەلىك ەگىلدى.
