شىمكەنتتىك پوليتسەي انگەلينا - بوكستان ءۇش دۇركىن الەم چەمپيونى

5474
Adyrna.kz Telegram

قۇقىق قورعاۋ سالاسىندا ەر ازاماتتارمەن قاتار قوعام قاۋىپسىزدىگىن قامتاماسىز ەتۋ جولىندا ەڭبەك ەتىپ جۇرگەن قىز-كەلىنشەكتەر دە از ەمەس. سولاردىڭ ءبىرى – شىمكەنت قالاسى پوليتسيا دەپارتامەنتى جىلدام قيمىلدايتىن ارنايى جاساق تاعىلىمدانۋشىسى – انگەلينا لۋكاس.

ول تاراز قالاسىنىڭ تۋماسى. انگەلينا وسى قالاداعى جالپى مەكتەپتى بىتىرگەن سوڭ، وتباسىمەن استاناعا قونىس اۋدارادى. نۇر-سۇلتان قالاسىنداعى «استانا» ۋنيۆەرسيتەتىنە وقۋعا ءتۇسىپ، حالىقارالىق قاتىناستار ماماندىعىن يگەرىپ شىعادى. انگەلينا ساباقتى جاقسى وقىپ قويماي، جاستايىنان سپورتپەن، 12 جاسىنان باستاپ بوكسپەن اينالىسادى. مۇنان بولەك، بيمەن دە شۇعىلدانادى.

انگەلينا الەكساندروۆنا 2017 جىلى شىمكەنت قالاسىنىڭ بوكس فەدەراتسياسىنىڭ شاقىرتۋىمەن شىمكەنتكە كەلەدى. 2020 جىلدان بەرى ىشكى ىستەر ورگاندارى قاتارىندا. «بولاشاق ماماندىعىمدى بالا كەزىمدە انىقتاعاندايمىن. باستاۋىش سىنىپتا «كىم بولعىم كەلەدى؟» دەگەن تاقىرىپتا شىعارما جازدىق قوي. سول كەزدە مەنى پوليتسيا ماماندىعى قىزىقتىردى»، - دەيدى جاس پوليتسەي.

كەز كەلگەن ساربازدىڭ گەنەرال بولۋدى ارماندايتىنى سەكىلدى انگەلينا دا قىزمەت ساتىسىندا بىلىكتى تۇلعا بولۋدى ماقسات تۇتادى. رەسپۋبليكالىق، حالىقارالىق دەڭگەيدەگى سپورتتىق شارالارعا قاتىسىپ، جۇلدەلى ورىنداردى يەلەنىپ ءجۇر. اتاپ ايتساق، جۋىردا ايەلدەر اراسىندا وتكەن تۇركياداعى الەم چەمپيوناتىندا جۇلدەلى 3-ورىنعا يە بولدى. بولگاريا رەسپۋبليكاسىندا ايەلدەر اراسىنداعى بوكستان وتكەن ەۆروپا كۋبوگىنان جۇلدەلى 2-ورىندى جەڭىپ الدى. كارانتين كەزىندە كۇندەلىكتى جاتتىعۋلاردىڭ ارقاسىندا بولگاريا، تۇركيا ەلدەرىنە بارىپ، 20 كۇندە 7 رەت شارشى الاڭعا شىعىپ، ونەر كورسەتتى.
الداعى ۋاقىتتا انگەلينا ازيا چەمپيوناتىنا قاتىسىپ، جازعى وليمپياداعا قاتىسۋعا ۇمىتكەر ەكەندىگىن دە جاسىرمادى. ەلىمىزدىڭ بولاشاعى ءۇشىن ەڭبەك ەتىپ جۇرگەن امبەباپ پوليتسەيدىڭ الار اسۋى الدا. ارقاشان پوليتسيا دەپارتامەنتىنىڭ نامىسىن قورعاپ جۇرگەن سپورتشى قىزدارىمىزبەن ماقتانامىز!

شىمكەنت قالاسى اكىمدىگىنىڭ ءباسپاسوز قىزمەتى

 

 

پىكىرلەر