“.اتىراۋ وبلىسىندا قر پرەمەر-ءمينيسترىنىڭ ورىنباسارى رومان سكليار جۇمىس ساپارىمەن بولدى.
ۇكىمەتتىك دەلەگاتسيا قۇرامىندا مينيسترلىكتەردىڭ ءبىرىنشى ۆيتسە-مينيسترلەرى مەن ۆيتسە-مينيسترلەرى دە كەلدى.
اتىراۋ وبلىسىنىڭ اعىمداعى ماسەلەلەرى تالقىلانعان جيىندا ايماق باسشىسى بايانداما جاسادى. وبلىس اكىمى ماحامبەت دوسمۇحامبەتوۆ الەۋمەتتىك سالادان باستاپ ينفراقۇرىلىم، ەكولوگيا، ەلەكتر ەنەرگياسى، سۋمەن قامتۋ سىندى وڭىردەگى ەڭ وزەكتى ماسەلەلەرگە جان-جاقتى توقتالدى. ولاردىڭ ناقتى سەبەپتەرىن اتاپ وتكەن ايماق باسشىسى پروبلەمالاردى شەشۋگە قاتىستى جاسالىپ جاتقان جۇمىستاردى دا بايانداپ ءوتتى. سونداي-اق ول كەيبىر وزەكتى ماسەلەلەردى شەشۋ ءۇشىن ۇكىمەتتىڭ قولداۋى قاجەتتىگىن ايتتى.
جيىندى قورىتىندىلاعان قر پرەمەر-ءمينيسترىنىڭ ورىنباسارى رومان سكليار اتىراۋ وبلىسىنىڭ ودان ارى دامۋى مەن سالالارداعى پروبلەمالاردى شەشۋ ءۇشىن ۇكىمەت ءتيىستى قولداۋ جاساۋدى قاراستىراتىنىن جەتكىزدى. سونداي-اق ءار مينيسترلىك وكىلىنە جەرگىلىكتى ورگاندارمەن بىرلەسە وتىرىپ اتالعان ماسەلەلەردى شەشۋگە قاتىستى ۇسىنىستار دايىنداۋدى تاپسىردى.
