اسحات ماەميروۆ: ءوز ورتامىزدان شىققان دارىندى سىرتتان كەلگەن «بىرەۋدىڭ» پىكىرىنە قاراي باعالايمىز

2819
Adyrna.kz Telegram

"پريزناك مالەنكيح نارودوۆ" دەگەن جاعىمسىز ۇعىم بار. ءوز ورتاڭنان شىققان دارىندى ادام بولسا، وعان تۇلعا رەتىندە قارامايسىڭ. مىندەتتى تۇردە ونىڭ دارىنى مەن قابىلەتىنە سىرتتان "بىرەۋ" كەلىپ باعا بەرۋى كەرەك! سول سىرتتان كەلگەن "بىرەۋ"-ءدىڭ پىكىرى ارقىلى، بيىكتىكتىڭ ولشەمىن باعامدايسىڭ.

اسىرەسە، جەتپىس جىل ءومىر سۇرگەن كەڭەستىك كەزەڭدە عاجايىپتار مەن كەرەمەتتەردىڭ بارلىعى باسقالاردا، ۇلى حالىقتاردا دەپ كەلدىك... ءوز ۇلتىمىزدىڭ كەرەمەتتەرىن، عاجايىپتارىن كوزگە ىلمەدىك. سىرتتان كەلىپ دانىشپانسىپ پىكىر بىلدىرگەندەرگە ء"لاپپاي" دەدىك. ال بۇل "جاعىمسىز ۇعىم", ۇعىم دەگەن بىلاي تۇرسىن، ءتىپتى ۇلتتى توقىراۋعا باستايتىن قورقىنىشتى ءۇردىس. بۇل جاعىمسىز ۇعىم مەن ءۇردىس ۇلتتىڭ بولمىسىنا ابدەن تەرەڭدەپ بويلاعان كەزدە "كومپلەكس مالىح نارودوۆ" دەگەن "قۇلدىق سانا" دەرتىنە اينالادى.

اۋەسبايدىڭ قاناتى جازعانداي: "قازاقتىڭ پۋشكينى، قازاقتىڭ لەۆيتانى، قازاقتىڭ وستروۆسكيى" سەكىلدى بىتپەيتىن قۇلدىق تەڭەۋلەرگە ۇلاسادى. مەنىڭشە، "حح عاسىردىڭ گومەرى", "قازاقتىڭ ششەپكينى", دەپ ساراپتاما جاساۋدىڭ ءوزى، بويىندا كومپلەكسى بار ادامدارعا ءتان سياقتى.

ۇلت - ءوز "مەن"-ءىن جوعالتپاۋ ءۇشىن، ءتىپتى جاھاندانۋ ءداۋىرىنىڭ بەل ورتاسىندا ءجۇرىپ ءوز "مەن"-ءىن بيىك ۇستاۋى ءۇشىن مۇنداي قورقىنىشتى ۇردىستەن ارىلۋى ءتيىس! ارينە، مۇنداي جاعىمسىز ۇردىستەردەن ارىلتاتىن تۋمىسىنان تالانتى ەرەكشە، كاسىبي قارىم-قابىلەتى وتە بيىك تۇلعالار! مەنىڭشە، الەمدىك ونەر كەڭىستىگىندەگى فەنومەن ديماش قۇدايبەرگەن سىندى تۇلعالاردى كورىپ، ءارى تانىپ وسكەن بۇگىنگى وسكەلەڭ ۇرپاقتىڭ بويىندا جوعارىداعىداي كەمباعال كومپلەكس مۇلدەم بولمايتىنىنا سەنەمىن!

ارينە، ۇلتتىڭ ساناسى مەن رۋحاني بولمىسىن اسقاقتاتاتىن كوپتەگەن كومپونەنتتەر بار. دەگەنمەن، عىلىمي اينالىم بىلاي تۇرسىن، ءتىپتى كۇندەلىكتى ومىردە "قازاقتىڭ اناۋى", قازاقتىڭ مىناۋى" دەگەن تەڭەۋلەرگە، وي ساباقتاۋلارعا جول بەرمەيىكشى!

پىكىرلەر