"Prıznak malenkıh narodov" degen jaǵymsyz uǵym bar. Óz ortańnan shyqqan daryndy adam bolsa, oǵan tulǵa retinde qaramaısyń. Mindetti túrde onyń daryny men qabiletine syrttan "bireý" kelip baǵa berýi kerek! Sol syrttan kelgen "bireý"-diń pikiri arqyly, bıiktiktiń ólshemin baǵamdaısyń.
Ásirese, jetpis jyl ómir súrgen keńestik kezeńde ǵajaıyptar men keremetterdiń barlyǵy basqalarda, uly halyqtarda dep keldik... Óz ultymyzdyń keremetterin, ǵajaıyptaryn kózge ilmedik. Syrttan kelip danyshpansyp pikir bildirgenderge "Láppaı" dedik. Al bul "jaǵymsyz uǵym", uǵym degen bylaı tursyn, tipti ultty toqyraýǵa bastaıtyn qorqynyshty úrdis. Bul jaǵymsyz uǵym men úrdis ulttyń bolmysyna ábden tereńdep boılaǵan kezde "Kompleks malyh narodov" degen "quldyq sana" dertine aınalady.
Áýesbaıdyń Qanaty jazǵandaı: "Qazaqtyń Pýshkıni, Qazaqtyń Levıtany, Qazaqtyń Ostrovskıi" sekildi bitpeıtin quldyq teńeýlerge ulasady. Menińshe, "HH ǵasyrdyń Gomeri", "Qazaqtyń epkıni", dep saraptama jasaýdyń ózi, boıynda kompleksi bar adamdarǵa tán sııaqty.
Ult - Óz "Men"-in joǵaltpaý úshin, tipti jahandaný dáýiriniń bel ortasynda júrip Óz "Men"-in bıik ustaýy úshin mundaı qorqynyshty úrdisten arylýy tıis! Árıne, mundaı jaǵymsyz úrdisterden aryltatyn týmysynan talanty erekshe, kásibı qarym-qabileti óte bıik tulǵalar! Menińshe, álemdik óner keńistigindegi fenomen Dımash Qudaıbergen syndy tulǵalardy kórip, ári tanyp ósken búgingi óskeleń urpaqtyń boıynda joǵarydaǵydaı kembaǵal kompleks múldem bolmaıtynyna senemin!
Árıne, ulttyń sanasy men rýhanı bolmysyn asqaqtatatyn kóptegen komponentter bar. Degenmen, ǵylymı aınalym bylaı tursyn, tipti kúndelikti ómirde "Qazaqtyń Anaýy", Qazaqtyń Mynaýy" degen teńeýlerge, oı sabaqtaýlarǵa jol bermeıikshi!
