الماتىدا كوروناۆيرۋس جۇقتىرعان بالالار سانى كۇرت كوبەيدى. بۇل تۋرالى ونلاين بريفينگ بارىسىندا الماتى قالاسى سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا ايتتى، دەپ حابارلايدى “ادىرنا” ۇلتتىق پورتالى.
قالىقوۆانىڭ مالىمدەۋىنشە، الماتىدا ەپيدەميولوگيالىق جاعداي ۋشىعىپ تۇر. ينفەكتسيا – وتە جۇقپالى.
«سوڭعى اپتادا بالالار اراسىندا ىندەتتى جۇقتىرۋ كۇرت ءوستى. مىسالى، 14 جاسقا دەيىنگى ناۋقاس بالالاردىڭ سانى 7%-دان 11%-عا دەيىن ۇلعايدى. سونداي-اق، ءبىر جاسقا دەيىنگى بالالار اراسىندا ۆيرۋس جۇقتىرۋ وسكەنىن بايقاپ وتىرمىز. 1 ناۋرىزدا 10 جاعداي تىركەلسە، قازىر 55 جاعدايعا دەيىن جەتىپ وتىر. وزگە جاستاعى ادامدار اراسىندا ۆيرۋس جۇقتىرۋ بۇرىنعىداي قالىپتا»،- دەيدى اسەل قالىقوۆا.
وتباسى مۇشەلەرى اراسىندا ۆيرۋس جۇقتىرۋ وقيعاسى دا ارتقانىن جەتكىزدى.
«ۆيرۋستى وتباسى مۇشەلەرىنەن جۇقتىرۋ وقيعاسى 34 پايىزعا ارتقان. ال ساۋدا ورىندارىندا ۆيرۋس جۇقتىرۋ جاعدايى كەرىسىنشە 22 پايىزعا دەيىن ازايعان. وعان دەمالىس كۇندەرى ساۋدا-ساتتىق ورىندارى مەن بازارلار جۇمىسىنىڭ توقتاتىلۋى ىقپال ەتتى. دەگەنمەن اۋلا ىشىندەگى دۇكەندەردە ۆيرۋس جۇقتىرۋ ءالى دە جوعارى دەڭگەيدە»، - دەيدى ول.
