فيليپپين اسكەريلەرى وڭتۇستىك قىتاي تەڭىزىنىڭ داۋلى ايماعىنا كىرىپ، شىقپاي وتىرعان جۇزدەگەن قىتاي كەمەلەرىن باقىلاۋعا جەڭىل جويعىش ۇشاقتاردى جىبەردى. فيليپپين دەرەۋ ارادا قىتاي ءوز كەمەلەرىن اكەتۋى ءتيىس دەپ وتىر.
ايماقتاعى قاقتىعىستىق كوڭىل-كۇي 200 قىتاي كەمەسىنىڭ داۋلى تەرريتورياعا كىرۋىمەن ەسەلەپ ارتتى. مانيلا بۇل ارەكەتتى "ارانداتۋ جانە ۇلتتىق مۇددەگە قاۋىپ ءتوندىرۋ" دەپ اتادى. قازىرگى تاڭدا قىتاي كەمەلەرى ءفيليپپيننىڭ ەكونوميكالىق ايماعى سانالاتىن ۇشتىك ءريفىنىڭ ماڭىندا تۇر.
فيليپپين قورعانىس ءمينيسترى دەلفين لورەنتسانا 27 ناۋرىز كۇنى ەلدىڭ اسكەري ۇشاقتارىن كوتەرىپ، باقىلاۋدى كۇشەيتەتىنىن مالىمدەگەن بولاتىن.
«ءبىزدىڭ تەڭىز جانە اۋە كۇشتەرىمىز ۇلتتىق قاۋىپسىزدىگىمىز بەن تاۋەلسىزدىگىمىزدى قورعاۋعا دايىن»، — دەپ مالىمدەدى ول.
رەسمي قىتاي تاراپى كەمەلەردىڭ تەڭىزدەگى داۋىلدان قاشىپ، ۋاقىتشا تۇراقتاعانىن مالىمدەدى. قازىرگى تاڭدا وڭتۇستىك شىعىس ازياداعى داۋلى ايماقتا جىل سايىن 3.4 ترلن دوللار بولاتىن ساۋدا اينالىمى وتەدى.
اسحات قاسەنعالي،
"ادىرنا" ۇلتتىق پورتالى
