تۇركىستان قالاسىندا الەمدە تەڭدەسى جوق "ۇشاتىن" تەاتر اشىلادى. ەرەكشە مادەني نىسان سامۇرىق قۇستىڭ الىپ جۇمىرتقاسى فورماسىندا سالىنادى، دەپ حابارلايدى "ادىرنا" ۇلتتىق پورتالى تۇركىستان وبلىسى اكىمىنىڭ ءباسپاسوز قىزمەتىنە سىلتەمە جاساپ.
ۇشاتىن تەاتر تۇركىستان قالاسىنىڭ مادەني-رۋحاني ورتالىعىندا ورنالاسقان "كەرۋەن ساراي" تۋريستىك كەشەنىندە بوي كوتەرەدى.
قالاداعى قۇرىلىس الاڭدارىن ارالاعان وبلىس اكىمى ومىرزاق شوكەەۆ دەمالىس ورتالىعىن اشۋعا دايىندىق بارىسىمەن تانىستى.
"جوبا اۆتورلارىنىڭ ايتۋىنشا، قيال-عاجايىپ ورتالىق سامۇرىق قۇستىڭ جۇمىرتقاسى اڭىزىنا نەگىزدەلگەن. كيەلى سامۇرىق قۇس بايتەرەكتىڭ بۇتاعىنداعى ۇياسىنا كەلىپ، كۇن بەينەلى التىن جۇمىرتقا سالادى. ءدال وسى التىن ءتۇستى الىپ جۇمىرتقا كەلبەتىندەگى ەرەكشە تەاتردا بايتەرەگىمىز سياقتى سيقىرلى ەرتەگىلەر ەلىنە، قازاق حالقىنىڭ تاريحىنا جاڭا تەحنولوگيالاردىڭ كومەگىمەن، 8 D فورماتتا اسەرلى ساياحات جاساۋعا بولادى", - دەلىنگەن حابارلامادا.
تەاتر-مۋزەيدە قازاقستاننىڭ وتكەنى، بۇگىنى مەن كەلەشەگى كورسەتىلەدى.
وبلىس اكىمدىگى شىعىس ۇلگىسىندە سالىنعان كەشەن قالا قوناقتارىنىڭ سۇيىكتى دەمالىس ورنىنا اينالاتىنىنا سەنىمدى.
تۇركىستان قالاسىنىڭ اكىمشىلىك ىسكەرلىك ورتالىعى اۋماعىندا اكىمشىلىك عيماراتتار مەن كوپقاباتتى 24 ءۇيدىڭ قاسبەتتەرىن ءبىر ۇلگىدە جارىقتاندىرۋ جۇمىستارى جۇرگىزىلۋدە. قالاداعى عيماراتتاردىڭ اينالاسى كوگالداندىرىلىپ، جارىقتاندىرىلىپ جاتىر.
قالانىڭ باستى كوشەلەرىنە تۇنگى جارىقتاندىرۋ جۇمىستارى جۇرگىزىلدى.
سونداي-اق، ياساۋي كەسەنەسىنىڭ الدىندا ەرەكشە جارىق شامدار ورناتىلدى. مينسكىدەن ارنايى الدىرىلعان اعاش كەيپىندەگى باقشا جارىق شامدارى تۇندە اينالانى سان الۋان تۇسكە بولەسە، كۇندىز سالقىن سۋ شاشىپ، اپتاپ ىستىقتان قورعايدى.
