Túrkistan qalasynda álemde teńdesi joq "ushatyn" teatr ashylady. Erekshe mádenı nysan Samuryq qustyń alyp jumyrtqasy formasynda salynady, dep habarlaıdy "Adyrna" ulttyq portaly Túrkistan oblysy ákiminiń baspasóz qyzmetine silteme jasap.
Ushatyn teatr Túrkistan qalasynyń mádenı-rýhanı ortalyǵynda ornalasqan "Kerýen saraı" týrıstik kesheninde boı kóteredi.
Qaladaǵy qurylys alańdaryn aralaǵan oblys ákimi Ómirzaq Shókeev demalys ortalyǵyn ashýǵa daıyndyq barysymen tanysty.
"Joba avtorlarynyń aıtýynsha, qııal-ǵajaıyp ortalyq Samuryq qustyń jumyrtqasy ańyzyna negizdelgen. Kıeli Samuryq qus Báıterektiń butaǵyndaǵy uıasyna kelip, kún beıneli altyn jumyrtqa salady. Dál osy altyn tústi alyp jumyrtqa kelbetindegi erekshe teatrda Báıteregimiz sııaqty sıqyrly ertegiler eline, qazaq halqynyń tarıhyna jańa tehnologııalardyń kómegimen, 8 D formatta áserli saıahat jasaýǵa bolady", - delingen habarlamada.
Teatr-mýzeıde Qazaqstannyń ótkeni, búgini men keleshegi kórsetiledi.
Oblys ákimdigi shyǵys úlgisinde salynǵan keshen qala qonaqtarynyń súıikti demalys ornyna aınalatynyna senimdi.
Túrkistan qalasynyń ákimshilik iskerlik ortalyǵy aýmaǵynda ákimshilik ǵımarattar men kópqabatty 24 úıdiń qasbetterin bir úlgide jaryqtandyrý jumystary júrgizilýde. Qaladaǵy ǵımarattardyń aınalasy kógaldandyrylyp, jaryqtandyrylyp jatyr.
Qalanyń basty kóshelerine túngi jaryqtandyrý jumystary júrgizildi.
Sondaı-aq, Iasaýı kesenesiniń aldynda erekshe jaryq shamdar ornatyldy. Mınskiden arnaıy aldyrylǵan aǵash keıpindegi baqsha jaryq shamdary túnde aınalany san alýan túske bólese, kúndiz salqyn sý shashyp, aptap ystyqtan qorǵaıdy.
