ەلىمىزدە اۋىل شارۋاشىلىعى ماقساتىنداعى جەرلەر جەكەمەنشىكتە ەمەس، تەك مەملەكەتتىڭ قۇزىرىندا بولۋى كەرەك. بۇل تۋرالى جەر رەفورماسى جونىندەگى كوميسسيانىڭ 1-وتىرىسىندا سەنات دەپۋتاتى اقىلبەك كۇرىشباەۆ ايتتى، دەپ حابارلايدى «ادىرنا» ۇلتتىق پورتالى قازاقپاراتقا سىلتەمە جاساپ.
«قازاقستان ءۇشىن اۋىلشارۋاشىلىعى ماقساتىنداعى جەر جاي عانا ءونىرىس قۇرالى ەمەس، ەڭ الدىمەن بۇل - ءبىزدىڭ ۇلتتىق يگىلىگىمىز، اتا-بابامىزدان قالعان تاريحي مۇرامىز، بۇكىل حالقىمىزدىڭ بايلىعى جانە ونىڭ باستى قۇندىلىعى. مەنىڭ جەكە پىكىرىم، قازاقستانداعى اۋىل شارۋاشىلىعى ماقساتىنداعى جەرلەر جەكەمەنشىكتە ەمەس، تەك مەملەكەتتىڭ قۇزىرىندا بولۋى كەرەك. ەڭ الدىمەن بۇل ءبىزدىڭ گەوساياسي جاعدايمىزعا بايلانىستى. اۋىل شارۋاشىلىعى جەرلەرىنىڭ كولەمى بويىنشا ءبىز الەمدە 6-ورىندا تۇرمىز. ال ەگىستىك القاپتارى بويىنشا جان باسىنا شاققاندا اۆستراليادان كەيىن ەكىنشى ورىندامىز. ياعني، ءبىر ادامعا شامامەن 1,3 گەكتار ەگىستىك جەر كەلەدى. باسقاشا ايتقاندا، بىزدە حالىق تىعىزدىعى وتە تومەن. سوندىقتان مەملەكەتتىڭ ۇلتتىق قاۋىپسىزدىگىن قامتاماسىز ەتۋ ءۇشىن جەر رەسۋرستارىمىزدىڭ جەكەمەنشىكتە ەمەس تەك قانا مەملەكەتتىك مەنشىكتە بولعانى ماڭىزدى. جەر تەك جالعا بەرىلۋى ءتيىس»، - دەدى كوميسسيانىڭ ءبىرىنشى وتىرىسىندا سەناتور.
ونىڭ اتاپ وتۋىنشە، الەمدىك تاجىريبەدە مۇنداي مىسالدار بار. ماسەلەن، نارىقتىق ەكونوميكاسى دامىعان يزرايلدە بارلىق اۋىل شارۋاشىلىعى جەرلەرى مەملەكەتتىڭ قۇزىرىندا.
