باس ۇستايتىن دارەجەلى بيىگىڭنەن قۇلدىراپ قۇلاپ، سيراق ۇسىنعانعا ءماز بولا قۇلدىراڭدايتىن قۇلدىق كەبىڭنەن قاشان اجىرارسىڭ، الاش جۇرتى؟ سىباعاڭدى سىعىمداپ ۋىستاپ، سىلقيتا اساپ جاتقاندارعا سىعىراڭداعان جارامساق، جالتاق كوزدى قاشانعى موليتە قاداي بەرەسىڭ؟ ويىنشىق ۇستاتقان بالاداي ەكى ەزۋىڭ قۇلاعىڭا جەتىپ، اسپان مەن جەردى الاقايلاعان «سۇيىنشىڭمەن» جاڭعىرتقاندا، قازاعىڭا، حالقىڭا ءسۇيىنىش ەمەس كۇيىنىش قاباتتايتىن كۇلكىلىگىڭنىڭ تاعى ءبىر جەلكەڭنەن جەلكەلەتكەنىن ۇقپادىڭ-اۋ...
ءوز ەلىڭدە، ءوز جەرىڭدە وتىرعان، قازاق ۇلتى-اۋ، وگەيلەتكەن ومىرىڭنەن ءبىر رەت جۇلقىنا اتقىپ تۇرىپ، ازات ەلدىڭ تۋعان ۇلى بولىپ، تاۋەلسىز وتاننىڭ اسقاق ازاماتى بولىپ، ءالى كۇنگە دەيىن بوساعادا قىلقيعان باسىڭدى تورگە نەگە وزعىزبايسىڭ؟ وزساڭ، سوندا عانا اناۋ دەربەس اۋدانىن تارتىپ الىپ، ارداقتى ەسىمىن قاراعاندىنىڭ ءبىر تۇكپىرىنە جاپسىرا سالعان قازداۋىستى قازىبەكتى قورعاي، قولداي الماعانىڭدى سەزەر مە ەدىڭ؟ سوندا عانا 1991-ءدىڭ قازانىندا اتى وشكەن وكتيابردى اۋدارىپ تاستايمىز دەپ تورعايدى زەڭبىرەكپەن اتقانداي بەرەكەسىز ارەكەتىڭنەن قىزارعان بەتتى باسا، بەزە قاشار ما ەدىڭ؟
قازاق رەسپۋبليكاسىنىڭ تۇڭعىش پرەزيدەنتى ۇلى اليحانعا ءوزىنىڭ قاراعاندىسىنىڭ، نە سوناۋ پەتروپاۆل، نە اناۋ پاۆلوداردىڭ اتىن باياعىدا-اق بەرەتىن ءوز وكىمىڭدى نەگە ىسكە اسىرمايسىڭ، الاش جۇرتى؟ ءوز تالاپ-تالقىڭدى نەگە ورىندامايسىڭ، قازاق ۇلتى؟
نەدەن قورقاسىڭ؟
ەلوردانىڭ اتىن بەس-اق مينۋت بۇرىن پرەزيدەنت اتالعان ادامنىڭ بەس مينۋتقا جەتكىزبەي وزگەرتە سالعانى ەسىڭنەن شىعىپ كەتىپ پە ەدى؟
كىم سوندا، الاش جۇرتى، قازاق ۇلتى، سەنى قورقىتىپ، ۇركىتىپ ەدى؟
ەلدىكتىڭ ەركىندىگىن، تاۋەلسىزدىكتىڭ تاۋاندىلىعىن ايعاقتاپ باتىلدىعىمەن سۇيىنتەتىن شىنايى «سۇيىنشىگە!» نە جەتسىن.
مەنى جاقتىرساڭدار دا، ءۋاجىمدى «مۋسوركاعا» لاقتىرساڭدار دا ءوز ەرىكتەرىڭ، قانداستارىم.
"ادىرنا" ۇلتتىق پورتالى.
