قىزىلوردادا قالا ورتاسىندا ورنالاسقان 64 پاتەرلىك جاتاقحانانىڭ باسپالداعى وپىرىلىپ، كەلىنشەك ەكى بالاسىمەن جەرتولەگە قۇلاپ كەتكەن. زارداپ شەككەندەردىڭ ايتۋىنشا، عيمارات ىزادان كۇن وتكەن سايىن مۇجىلۋدە. ىرگەتاسى شوگىپ، كەسەكتەرى ۇگىتىلىپ جاتقان ۇيدە ۇرەيمەن ءومىر ءسۇرىپ جاتقان تۇرعىندار تۋرالى "استانا" ارناسى حابارلادى.
اسەم كەشكىسىن بالالارىن بالاباقشادان الىپ كەلە جاتقان. باسپالداقتىڭ قالاي وپىرىلىپ كەتكەنىن ءوزى دە تۇسىنبەي قالعان. "قاس-قاعىم ساتتە جەرتولەگە قۇلاپ كەتتىم" دەيدى ول. جانىنداعى 1 جانە 2 جاستاعى بالالارىن پەرىشتەسى قاقتى دەپ وتىر. الايدا، بويىنداعى ۇرەيى ءالى باسىلماعان.
ء"بىرىنشى ءوزىم قۇلادىم، ەكى تسەمەنت ۇستىمە قۇلادى. سودان سوڭ ەكى بالا كەلىپ قۇلادى. ەكى بالانىڭ ءبىرىنىڭ باسى تسەمەنتكە ءتيدى. ونى اپارىپ تەكسەرتتىم، ميى شايقالعان دەيدى. ءوزىمنىڭ دەنساۋلىعىم جارامايدى. اياعىم ءىسىپ، ءىشىمنىڭ ءبارىن ءتىلىپ كەتكەن", – دەيدى قىزىلوردا قالاسىنىڭ تۇرعىنى اسەم مىرزاحانوۆا.
تۇرعىنداردىڭ ايتۋىنشا، عيماراتتىڭ سالىنعانىنا قىرىق جىلدان اسقان. قالانىڭ قاق ورتاسىندا تۇرىپ، تابيعي گازعا قوسىلماعان. ءتىپتى، قىس بويى جىلۋعا جارىمادىق دەپ وتىر. ال جاۋىن جاۋسا توبەدەن سۋ اعىپ، ابىگەرگە سالادى ەكەن.
"ەكىنشى ەتاجعا دەيىن ىزا، ەكىنشى ەتاجداعىلداردىڭ ءوزى ىزانىڭ يىسىنەن دەم الا المايدى. قىسى جازى ماسا قاپتايدى. جەرتولەگە ءتۇسىپ قارادىق، ەشقانداي تىرەۋىش جوق. ءبىر كۇنى بولماسا ءبىر كۇنى ورتاسىنا ءتۇسۋى مۇمكىن. سونداي قاۋىپپەن قانشاما حالىق وتىرمىز", – دەيدى تۇرعىنداردىڭ ءبىرى جارقىناي كەنجەتاەۆا.
جاتاقحاناداعى توتەنشەي جاعداي اكىمدىكتەگىلەردىڭ دە قۇلاعىنا جەتكەن. ونداعىلار قۇلاعان باسپالداقتى جەدەل جوندەپ بەرگەن كورىنەدى. ال باسپاناداعى وزگە ماسەلەلەردى شەشۋگە قاۋقىرسىز ەكەن. ولار مەنشىك يەلەرىنىڭ بىرلەستىگىن قۇرۋدى ۇسىنعان.
"تۇرعىن ءۇي قاتىناستارى زاڭىنداعى ەنگىزىلگەن وزگەرىستەرگە سايكەس مەنشىك يەلەرىنىڭ بىرلەستىگى نەمەسە ءجاي سەرىكتەستىك قۇرۋ جونىندە تولىققاندى تۇسىندىرمە جۇمىستارى جۇرگىزىلەتىن بولادى. ءارى قاراي تۇرعىنداردىڭ تاڭداۋى بويىنشا باسقارۋ ورگانىن تاڭداسا، سەرۆيستىك كومپانيا تاراپىنان ءتيىستى جۇمىستارىن اتقارۋى قاجەت", – دەدى قىزىلوردا قالالىق تۇكش جانە اۆتوموبيل جولدارى ءبولىمىنىڭ باسشىسى ءبىرجان دالاباەۆ.
بۇگىندە باسپالداعى وپىرىل جاتقان عيمارات رەسمي تۇردە اپاتتى دەپ تانىلماعان. ول ءۇشىن تۇرعىندار ارنايى ماماندار شاقىرتىپ، ورتاق اقشا شىعارىپ، ساراپتاما جاساتۋى قاجەت. سوندا عانا مۇنداعى تۇرعىندار ءتيىستى سانات بويىنشا پاتەر كەزەگىنە تۇرا الادى، دەيدى اكىمدىك وكىلدەرى.
