Qyzylordada qala ortasynda ornalasqan 64 páterlik jataqhananyń baspaldaǵy opyrylyp, kelinshek eki balasymen jertólege qulap ketken. Zardap shekkenderdiń aıtýynsha, ǵımarat yzadan kún ótken saıyn mújilýde. Irgetasy shógip, kesekteri úgitilip jatqan úıde úreımen ómir súrip jatqan turǵyndar týraly "Astana" arnasy habarlady.
Ásem keshkisin balalaryn balabaqshadan alyp kele jatqan. Baspaldaqtyń qalaı opyrylyp ketkenin ózi de túsinbeı qalǵan. "Qas-qaǵym sátte jertólege qulap kettim" deıdi ol. Janyndaǵy 1 jáne 2 jastaǵy balalaryn perishtesi qaqty dep otyr. Alaıda, boıyndaǵy úreıi áli basylmaǵan.
"Birinshi ózim quladym, eki ement ústime qulady. Sodan soń eki bala kelip qulady. Eki balanyń biriniń basy ementke tıdi. Ony aparyp tekserttim, mıy shaıqalǵan deıdi. Ózimniń densaýlyǵym jaramaıdy. Aıaǵym isip, ishimniń bárin tilip ketken", – deıdi Qyzylorda qalasynyń turǵyny Ásem Myrzahanova.
Turǵyndardyń aıtýynsha, ǵımarattyń salynǵanyna qyryq jyldan asqan. Qalanyń qaq ortasynda turyp, tabıǵı gazǵa qosylmaǵan. Tipti, qys boıy jylýǵa jarymadyq dep otyr. Al jaýyn jaýsa tóbeden sý aǵyp, ábigerge salady eken.
"Ekinshi etajǵa deıin yza, ekinshi etajdaǵyldardyń ózi yzanyń ıisinen dem ala almaıdy. Qysy jazy masa qaptaıdy. Jertólege túsip qaradyq, eshqandaı tireýish joq. Bir kúni bolmasa bir kúni ortasyna túsýi múmkin. Sondaı qaýippen qanshama halyq otyrmyz", – deıdi turǵyndardyń biri Jarqynaı Kenjetaeva.
Jataqhanadaǵy tótensheı jaǵdaı ákimdiktegilerdiń de qulaǵyna jetken. Ondaǵylar qulaǵan baspaldaqty jedel jóndep bergen kórinedi. Al baspanadaǵy ózge máselelerdi sheshýge qaýqyrsyz eken. Olar menshik ıeleriniń birlestigin qurýdy usynǵan.
"Turǵyn úı qatynastary zańyndaǵy engizilgen ózgeristerge sáıkes menshik ıeleriniń birlestigi nemese jáı seriktestik qurý jóninde tolyqqandy túsindirme jumystary júrgiziletin bolady. Ári qaraı turǵyndardyń tańdaýy boıynsha basqarý organyn tańdasa, servıstik kompanııa tarapynan tıisti jumystaryn atqarýy qajet", – dedi Qyzylorda qalalyq TÚKSh jáne avtomobıl joldary bóliminiń basshysy Birjan Dalabaev.
Búginde baspaldaǵy opyryl jatqan ǵımarat resmı túrde apatty dep tanylmaǵan. Ol úshin turǵyndar arnaıy mamandar shaqyrtyp, ortaq aqsha shyǵaryp, saraptama jasatýy qajet. Sonda ǵana mundaǵy turǵyndar tıisti sanat boıynsha páter kezegine tura alady, deıdi ákimdik ókilderi.
