سەنات دەپۋتاتى دينار نۇكەتاەۆا قازاقستانداعى ارالاس ءتىلدى مەكتەپتەردىڭ كوبەيگەنىن ايتىپ، بولاشاقتا قازاق ءتىلىنىڭ تاعدىرى قالاي بولادى دەپ الاڭدادى.
«ەلىمىزدە كۇندىزگى جالپى ءبىلىم بەرەتىن مەكتەپتەردىڭ سانى – 6973. وقۋشىلاردىڭ سانى – 3 ملن 250 مىڭ. ونىڭ ىشىندە قازاق تىلىندە وقىتاتىن 3726 مەكتەپ، ورىس تىلىندە وقىتاتىن 1181 مەكتەپ، ارالاس تىلدە وقىتاتىن 2043 مەكتەپ بار.
باسقا تىلدە وقىتاتىن 23 مەكتەپ بار: ونىڭ ىشىندە 12 مەكتەپ – وزبەك تىلىندە، 11 مەكتەپ – ۇيعىر تىلىندە. ياعني، ارالاس ءتىلدى مەكتەپتەر جالپى مەكتەپ سانىنىڭ 30%-عا جۋىعىن قۇراپ وتىر. بۇل الەمدە ەشبىر ەلدە كەزدەسپەيتىن، تەك قانا قازاقستاندا بار جاعداي. بۇل ءۇردىس ودان ارى دا جالعاسا بەرەتىن بولسا، ودان كەيىن قازاق ءتىلىنىڭ تاعدىرى، ەل تاعدىرى قالاي بولاتىنىن ەشكىم بولجاپ ايتا المايدى»، – دەدى سەنات دەپۋتاتى دينار نۇكەتاەۆا.
قازاقستاندا ارالاس ءتىلدى مەكتەپتەردە ءبىلىم الاتىن وقۋشىلار سانى سوڭعى 5 جىلدا ايتارلىقتاي وسكەن.
«ەلىمىزدەگى ارالاس ءتىلدى مەكتەپتەردىڭ سوڭعى 5 جىلداعى جاعدايىنا قاراساق، 2016 جىلى – 2045 مەكتەپ، 2017 جىلى – 2037 مەكتەپ، 2018 جىلى – 2046 مەكتەپ، 2019 جىلى – 2054 مەكتەپ بولعان.
ال 2020 جىلى ارالاس ءتىلدى 2043 مەكتەپ جۇمىس ىستەپ، وندا 1 393 727 وقۋشى ءبىلىم الىپ جاتىر. دەمەك، 2016 جىلمەن سالىستىرعاندا، وسىنداي مەكتەپتەردە وقيتىنداردىڭ ءوسۋ تەندەنتسياسى جىل سايىن ۇدەي ءتۇسىپ، ولاردىڭ سانى 196 715 وقۋشىعا دەيىن ارتقان»، – دەپ ناقتىلادى سەناتور.
