ايتىس اقىندارى مەن جىرشى-تەرمەشىلەر حالىقارالىق وداعىنىڭ باسقارما توراعاسى ءجۇرسىن ەرمان ءوزىنىڭ الەۋمەتتىك جەلىدەگى پاراقشاسىندا ۇكىمەت باسشىسىنىڭ ورىنباسارى يمانعالي تاسماعامبەتوۆكە باعىتتاپ وكپەسىن ايتىپتى.
ارتىق كەتسەم اللا ءوزى كەشىرەر…
«مەن بۇل سوزدەردى اشۋ-ىزا ۇستىندە جازىپ وتىرمىن، ارتىق كەتسەم اللا تاعالا ءوزى كەشىرەر. اقيقاتىن ايتار بولسام، بۇل جازبا ۇكىمەت باسشىسىنىڭ ورىنباسارى يمانعالي تاسماعامبەتوۆتىڭ دارگەيىنە جەتەر مە ەكەن دەگەن دامەمەن جازىلۋدا. ءوزى وقىماسا دا شىلاۋىندا جۇرگەن ارىپتەسىمىز جۇنىسبەك سۇلتانمۇراتوۆتىڭ كوزىنە شالىنارىنا كۇمان جوق. ايتىس اقىندارى مەن جىرشى-تەرمەشىلەر حالىقارالىق وداعىنىڭ باسقارما توراعاسى رەتىندە داۋسىمدى شىعارىپ، تۇياق سەرىپپەسكە ءاددىم جوق.
ي. تاسماعامبەتوۆ الماتىنىڭ اكىمى بولىپ تۇرعان كەزىندە ءبىر رەت ايتىسقا كەلگەن اقىنداردى قابىلداپ، د. قوناەۆتىڭ اس ىشكەن بولمەسىندە ايتىسكەرلەرگە شاي بەرىپ قۇرمەت كورسەتكەن. ودان باسقا، ءبىز ايتىستى پاريجگە اپارامىز دەگەندە ارنايى ۇشاقتى 3-4 كۇنگە جالداپ اپەرگەن مارتتىگىن دە ۇمىتقان جوقپىز، الاش بالاسىنا اڭىزداي جىرلاپ ايتۋمەن كەلەمىز. سول قامقورشىمىز بىلتىر ۇكىمەتكە ورىنباسار بولىپ كەلگەندە ەندى ايتىستىڭ ايى وڭىنان تۋار دەپ بوركىمىزدى اسپانعا اتىپ قۋاندىق. سول بوركىمىز ءالى جەرگە تۇسكەن جوق، ال قۋانىشىمىز جەلگە ۇشىپ كەتتى…”
…مۇنىڭ سەبەبى بار
بىرىنشىدەن، يۋنەسكو-نىڭ ماتەريالدىق ەمەس مۇرالار تىزىمىنە ەنگەن اتامۇرا ونەرىمىزدىڭ xالىقارالىق سەرتيفيكاتى استاناعا كەلگەندە سونىڭ تاپسىرىلۋ سالتاناتىنان رەسمي وداعىمىز تىسقارى قالدى. وداعىمىز جوق سياقتى، قولايسىز ەكەن.
ەكىنشىدەن، ىلە-شالا تاۋەلسىزدىكتىڭ 25 جىلدىعىنا وراي 25 مىڭ ادامعا سولكەباي تاراتىلىپ جاتقاندا ءبىر دە ءبىر ايتىسكەرگە رەسمي قۇرمەت كورسەتىلمەدى. جىلداعى جاعداي تاعى قايتالاندى. وداق جىل سايىن قانشا ۇسىنىس جاساپ جاتسا دا تاۋەلسىزدىكتى جىرلاۋمەن تاڭدايى توزىپ كەلە جاتقان ءبىر ايتىسكەر اقىنعا نە وردەن، نە مەدال نە قۇرمەتتى اتاق بۇيىرمايدى. جىلدا وسى. نە پرەزيدەنتتىڭ، نە مەملەكەتتىڭ ستيپەندياسى تيمەيدى. تىم بولماسا مادەنيەت مينيسترلىگىنىڭ «مادەنيەت سالاسىنىڭ ۇزدىگى» دەگەن توسبەلگىسىنە تەڭ كورمەيتىندەي بۇل سورلى ايتىسكەرلەر كىمنەن كەم ەدى؟ الاش بالاسىنىڭ ازاتتىقتى اڭساعان ارمانىن اسقاق جىرعا ارقاۋ ەتىپ، رۋxىمىزدى كوتەرگەن، ەلدى رۋxاني تاۋەلسىزدىككە تاربيەلەگەن، ەل تاۋەلسىزدىگىنىڭ سالتاناتىن تالماي جىرلاپ كەلە جاتقان اتامۇرا ونەردىڭ مۇراگەرلەرىن توي ۇستىندە ارقادان قاعا سالسا قايتەدى؟ سونشا كەشپەيتىندەي نە ايتىلىپ ەدى؟
بۇل نە مازاق؟
ۇشىنشىدەن، ىزامىزدى شاراسىنان شىعارعان سوڭعى وقيعا. ايتىسقا قول سوزعان بىرەۋدىڭ اتىن اتاپ قالساق سوعان كەسىرىم تيە مە دەپ قورقاتىن بولدىق. 3-4 جەلتوقساندا وتكەن «التىن دومبىرا» ايتىسىنا ەش تەلەارنا ىقىلاس تانىتپاعان سوڭ الماتى قالاسى اكىمىنىڭ ورىنباسارى ارمان قىرىقباەۆ «ەۋرازيا» تەلەارناسىنىڭ باسشىسىنا جالىنعانداي بولىپ ءتۇسىرتىپ الىپ ەدى. 31 جەلتوسان – 1, 2 قاڭتاردا كورسەتەمىز دەپ جارنامالانعان سول ايتىستىڭ ورنىنا قايداعى ءبىر الەكەي-شۇلەكەي شاتپاق كورسەتىلىپ جاتقانىنا ءۇش كۇن بولدى. بۇل نە مازاق؟
يۋنەسكو-نىڭ قاراماعىنا الىنىپ xالىقارالىق زاڭنامالارمەن قورعالاتىن ايتىسىمىز وسى ما؟ ءتىپتى، ءدال وسى ايتىستا ەلباسى ن. ءا. نازارباەۆتىڭ تاۋەلسىزدىككە سىڭىرگەن ەڭبەگىن اسقاقتاتا جىرلاعاننان بوتەن ءسوز جوق ەدى عوي! الدە بۇل باعىتىمىز دا بىرەۋلەرگە جاقپايتىن بولعانى ما؟ ايتىستى قاناتىنىڭ استىنا العان «نۇر وتاننان» دا ىقپالدى كۇشتەر بار ما؟ وندا ايتىستى ءوز قارجىلارىنا وتكىزىپ جەرگىلىكتى تەلەارنا ارقىلى كورسەتىپ ەلباسىنىڭ ساياساتىن تاباندىلىقپەن جۇرگىزىپ كەلە جاتقان قىرىمبەك كوشەرباەۆ، بەردىبەك ساپارباەۆ، باقتىقوجا ىزمۇxامبەتوۆ، نۇرلان نوعاەۆ جانە باۋىرجان بايبەك سياقتى ازاماتتارعا «حالىق قاھارمانى» اتاعىن بەرۋ كەرەك قوي.
وسى ارىز-مۇڭىمىزدى يمانعالي تاسماعامبەتوۆكە ايتپاعاندا كىمگە ايتامىز؟! قازاقتا ەستىر ءبىر قۇلاق قالدى ما؟! كەيدە ەكى قولىمدى توبەمە قويىپ، 150 ايتىسكەردى سوڭىما ەرتىپ، باسقا، بوتەن ءبىر ەلگە جەر اۋىپ كەتكىم كەلەدى».
