قوستاناي وبلىسىنىڭ پوليتسيا قىزمەتكەرلەرى بالانى ءولتىرۋ ءىسىن تەرگەپ جاتىر. كۇدىككە قىزدىڭ اناسى ىلىكتى.تەرگەۋشىلەرگە ون جىلدان استام ۋاقىت بۇرىن ءبىر جارىم جاسار قىزدى ولتىرگەنى تۋرالى اقپارات تۇسكەن، دەپ حابارلادى alau. پورتالى.
ءتارتىپ ساقشىلارى قىزعا قاتىستى بارلىق اقپاراتتى تەكسەرە كەلە، تەرگەۋدى باستادى. بالا ازاماتتىق حال اكتىلەرىن تىركەۋ بولىمىندە تىركەلگەن. قۇجاتتاردا قىزدىڭ اناسى تۇرعان اۋىل كورسەتىلگەن. الايدا ايەل دە، ونىڭ قىزى دا وندا ۇزاق جىلدار بويى تۇرماعانى انىقتالدى.
ناتيجەسىندە پوليتسەيلەر بالانىڭ اناسىن تاپتى، ول بولعان جاعدايدى ايتىپ بەرگەن.
"جانجال كەزىندە ول ۇيدەن كەتىپ قالعان. ونى ۇيدەن قۋىپ شىققان... وسى سەبەپتى جاعدايى قيىنداعان، ول بالانى ەلسىز دالادا ءولتىرىپ، تاستاپ كەتكەن", - دەدى قوستاناي وبلىسى پوليتسيا دەپارتامەنتى تەرگەۋ باسقارماسىنىڭ ءبولىم باستىعى ارتەم تكاچەنكو.
ايەل پوليتسەيلەرگە بالانى تۇنشىقتىرىپ ولتىرگەنىن، قىزدىڭ دەنەسىن اۋىل شەتىنە قالدىرىپ، وبلىستىڭ باسقا اۋدانىنا كەتكەنىن مويىندادى.
بالانىڭ سۇيەگى تابىلمادى. ايەل كورسەتكەن جەر ادام تانىماستاي وزگەرگەن. ول جەر بۇرىن ەلسىز دالا بولعان، قازىر جول سالىنعان.
"تەوريالىق تۇرعىدان، ارينە، وزىنە جالعان كىنا تاعۋى مۇمكىن. ياعني، دالەل بولۋعا ءتيىس. بالا دۇنيەگە كەلگەن، قازىر جوق، دالەل ازىرگە وسى. ول ءتىرى بولۋى دا مۇمكىن", - دەپ ءتۇسىندىردى ءبولىم باستىعى.
