وتكەن عاسىردىڭ 60-جىلدارى تورعاي جەرىنە دە وزگە ۇلت وكىلدەرى اعىلىپ كەلە باستاعان-دى. ارينە، جەرگىلىكتى حالىق ولاردى جاتىرقاعان جوق. قولىنداعى بارىمەن ءبولىسىپ، باۋىرىنا تارتتى.
سەكسەننىڭ سەڭگىرىنە شىققان ارداگەر پوشتاشى فازىلحان ماۋدانوۆ تا كوپ جىل بويى ەرەۆاننان حات الىپ تۇرعان ەكەن. ارميان ۇلتىنىڭ جىگىتتەرىمەن تانىستىعى كەيىن دوستىققا ۇلاسقان. قوستانايلىق قاريا مۇنى كەزىندە جەرگىلىكتى حالىقتىڭ قامقورلىعىن كورگەن ارميان دوستارىنىڭ ادال پەيىلى دەپ سانايدى.
قازاقتار ءتۇرلى تاعدىرمەن كەلگەن وزگە ۇلىس وكىلدەرىن جاتسىنباي، باۋىرىنا باستى. داستارحانداعى دامىمەن ءبولىستى. وسىلايشا، ادامگەرشىلىكتىڭ زور ۇلگىسىن كورسەتتى. سوسىن بۇل – وزىمىزگە-ءوزىمىز ەمەس، وزگە ۇلت وكىلدەرىنىڭ قازاق حالقىنا العىس ايتاتىن كۇنى! مۇنى ەشقاشان ۇمىتۋعا بولمايدى. العىس ايتۋ كۇنى مەرەكەسىنىڭ ماڭىزى دا وسىندا، – دەيدى ول.
ارداگەردىڭ ايتۋىنشا، سوعىستان كەيىن، كولحوزدار قۇرىلىپ جاتقان ۋاقىتتا تورعاي جەرىنە وزگە ۇلت وكىلدەرى كەلە باستاعانىنا كۋا بولعان.
كەيبىرى ەلىنە قايتقاننان كەيىن دە قيماستىق سەزىممەن كوپ جىل بويى حات جازىپ تۇردى. قازاق حالقىنىڭ ادال، كىشىپەيىل، باۋىرمال جۇرت ەكەنىنە كوزى جەتكەن عوي. سونداي حاتتاردى تالاي مارتە يەلەرىنە تابىستاعانبىز. سوسىن ءبىز سەن – ارميانسىڭ، گرۋزينسىڭ دەگەن جوقپىز، دوستارىمىز سياقتى ارالاستىق. توتوسيان سەرگەي حوساتۋنوۆيچ، اساتۋريان ارتەم ميحايلوۆيچ دەگەن ارمياندار بولدى، ولار جاڭا جىلدا قۇتتىقتاپ، تۋ سوناۋ ەرەۆاننان سالەمدەمە سالىپ تۇردى، – دەيدى قارت پوشتاشى.
فازىلحان ماۋدانوۆ بۇگىندە قوستاناي قالاسىندا تۇرادى. كورشىلەرى دە وزگە ۇلت وكىلدەرى. ولارمەن دە تاتۋ-ءتاتتى – ءبىر ءۇيدىڭ بالالارىنداي ارالاسىپ-قۇرالاسىپ تۇرادى ەكەن.
قازىر ەلىمىزدە جۇزدەگەن دياسپورا وكىلدەرى ءومىر ءسۇرىپ جاتىر. «ىنتىماقتى ەلگە باق تۇرادى»، بەيبىت كۇندە ادال ەڭبەك ەتىپ، ورتاق وتانىمىز قازاقستانعا العىس ءبىلدىرۋىمىز كەرەك، – دەيدى فازىلحان ماۋدانوۆ.
ەڭبەك ارداگەرى 1956 جىلى ونجىلدىقتى بىتىرگەن سوڭ، 2005 جىلعا دەيىن بايلانىس سالاسىندا جۇمىس ىستەگەن. پوشتا سالاسىنا 49 جىل ءومىرىن ارناعان. ادال ەڭبەگى اقتالىپ، «ەرەن ەڭبەگى ءۇشىن» مەدالى مەن «ەڭبەك قىزىل تۋ» وردەنىن كەۋدەسىنە قاداعان.
تاۋەلسىزدىگىمىزدىڭ 30 جىلدىق مەرەيتويى قۇتتى بولسىن! ەلىمىز ماڭگى بولۋى ءۇشىن ايانباي ادال ەڭبەك ەتۋ كەرەك، – دەدى ارداگەر ءسوز سوڭىندا.
