Ótken ǵasyrdyń 60-jyldary Torǵaı jerine de ózge ult ókilderi aǵylyp kele bastaǵan-dy. Árıne, jergilikti halyq olardy jatyrqaǵan joq. Qolyndaǵy barymen bólisip, baýyryna tartty.
Seksenniń seńgirine shyqqan ardager poshtashy Fazylhan Maýdanov ta kóp jyl boıy Erevannan hat alyp turǵan eken. Armıan ultynyń jigitterimen tanystyǵy keıin dostyqqa ulasqan. Qostanaılyq qarııa muny kezinde jergilikti halyqtyń qamqorlyǵyn kórgen armıan dostarynyń adal peıili dep sanaıdy.
Qazaqtar túrli taǵdyrmen kelgen ózge ulys ókilderin jatsynbaı, baýyryna basty. Dastarhandaǵy dámimen bólisti. Osylaısha, adamgershiliktiń zor úlgisin kórsetti. Sosyn bul – ózimizge-ózimiz emes, ózge ult ókilderiniń qazaq halqyna alǵys aıtatyn kúni! Muny eshqashan umytýǵa bolmaıdy. Alǵys aıtý kúni merekesiniń mańyzy da osynda, – deıdi ol.
Ardagerdiń aıtýynsha, soǵystan keıin, kolhozdar qurylyp jatqan ýaqytta Torǵaı jerine ózge ult ókilderi kele bastaǵanyna kýá bolǵan.
Keıbiri eline qaıtqannan keıin de qımastyq sezimmen kóp jyl boıy hat jazyp turdy. Qazaq halqynyń adal, kishipeıil, baýyrmal jurt ekenine kózi jetken ǵoı. Sondaı hattardy talaı márte ıelerine tabystaǵanbyz. Sosyn biz sen – armıansyń, grýzınsiń degen joqpyz, dostarymyz sııaqty aralastyq. Totosıan Sergeı Hosatýnovıch, Asatýrıan Artem Mıhaılovıch degen armıandar boldy, olar Jańa jylda quttyqtap, týý sonaý Erevannan sálemdeme salyp turdy, – deıdi qart poshtashy.
Fazylhan Maýdanov búginde Qostanaı qalasynda turady. Kórshileri de ózge ult ókilderi. Olarmen de tatý-tátti – bir úıdiń balalaryndaı aralasyp-quralasyp turady eken.
Qazir elimizde júzdegen dıaspora ókilderi ómir súrip jatyr. «Yntymaqty elge baq turady», beıbit kúnde adal eńbek etip, ortaq Otanymyz Qazaqstanǵa alǵys bildirýimiz kerek, – deıdi Fazylhan Maýdanov.
Eńbek ardageri 1956 jyly onjyldyqty bitirgen soń, 2005 jylǵa deıin baılanys salasynda jumys istegen. Poshta salasyna 49 jyl ómirin arnaǵan. Adal eńbegi aqtalyp, «Eren eńbegi úshin» medali men «Eńbek Qyzyl Tý» ordenin keýdesine qadaǵan.
Táýelsizdigimizdiń 30 jyldyq mereıtoıy qutty bolsyn! Elimiz máńgi bolýy úshin aıanbaı adal eńbek etý kerek, – dedi ardager sóz sońynda.
