رەسەيدە بالا ساۋداسىمەن اينالىسقان قازاقستاندىق ايەل ۇستالدى. ونىڭ نارەستە ءۇشىن 13 مىڭ دوللار العانىن كراسنويار ولكەسىنىڭ تەرگەۋ ءبولىمى حابارلادى، دەپ حابارلايدى "ادىرنا" ۇلتتىق پورتالى «استانا» تەلەارناسىنا سىلتەمە جاساپ.
«تەرگەۋ بارىسىندا ايەلدىڭ بوسانۋ ءۇشىن كراسنويارسكىگە كەلگەنى انىقتالدى. قالادا وعان پاتەر جالداپ، مەديتسينالىق كومەك كورسەتىلگەن. ول جاڭا تۋعان نارەستەسىن بىردەن الاياقتارعا تاپسىرعان. 2020 جىلعى ساۋىردە ايەل ۇلىن بوسانىپ، كەيىن بالاسىنا تۋ تۋرالى كۋالىك الىپ، كۇدىكتىلەرگە سەنىمحات جازىپ بەرگەن. وسىلايشا قازاقستان ازاماتى ءىس جۇزىندە جاڭا تۋعان بالاسىن ساتىپ جىبەرگەن. كەيىن ول قازاقستانعا كەلىپ، بالانى بەرگەنى ءۇشىن 13 مىڭ دوللار مولشەرىندە اقشا العان»، – دەپ حابارلادى كراسنويار ولكەسى جانە حاكاسيا رەسپۋبليكاسى بويىنشا رەسەي مەملەكەتتىك تەرگەۋ كوميتەتى وكىلدەرى.
ءىس بويىنشا ءۇش كۇدىكتى انىقتالدى. تەرگەۋشىلەر مالىمەتىنە سۇيەنسەك، بالانى ساتۋعا ءتارتىپ ساقشىسى كومەكتەسكەن. 33 جاستاعى ەر ادام اقشا ءۇشىن بالا كوتەرۋگە دايىن ايەلدەردى تاۋىپ، كەيىن بالالارىن شەتەلدىكتەرگە ساتقان. وسىلايشا توعىز ءسابيدى ساتىپ ۇلگەرگەن. ولاردىڭ ءبارى قازىر سابيلەر ۇيىندە.
