Reseıde bala saýdasymen aınalysqan qazaqstandyq áıel ustaldy. Onyń náreste úshin 13 myń dollar alǵanyn Krasnoıar ólkesiniń tergeý bólimi habarlady, dep habarlaıdy "Adyrna" ulttyq portaly «Astana» telearnasyna silteme jasap.
«Tergeý barysynda áıeldiń bosaný úshin Krasnoıarskige kelgeni anyqtaldy. Qalada oǵan páter jaldap, medıınalyq kómek kórsetilgen. Ol jańa týǵan nárestesin birden alaıaqtarǵa tapsyrǵan. 2020 jylǵy sáýirde áıel ulyn bosanyp, keıin balasyna týý týraly kýálik alyp, kúdiktilerge senimhat jazyp bergen. Osylaısha Qazaqstan azamaty is júzinde jańa týǵan balasyn satyp jibergen. Keıin ol Qazaqstanǵa kelip, balany bergeni úshin 13 myń dollar mólsherinde aqsha alǵan», – dep habarlady Krasnoıar ólkesi jáne Hakasııa Respýblıkasy boıynsha Reseı Memlekettik tergeý komıteti ókilderi.
Is boıynsha úsh kúdikti anyqtaldy. Tergeýshiler málimetine súıensek, balany satýǵa tártip saqshysy kómektesken. 33 jastaǵy er adam aqsha úshin bala kóterýge daıyn áıelderdi taýyp, keıin balalaryn sheteldikterge satqan. Osylaısha toǵyz sábıdi satyp úlgergen. Olardyń bári qazir Sábıler úıinde.
