Elimizde "Sport bapkeri kúnin" resmı túrde engizýdi usyndy. Bul týraly "Qazaqstan sportshylar odaǵy" qoǵamdyq birlestigi habarlady.
"Elimizde kóptegen kásibı mereke atap ótiledi. Olardyń ishinde Muǵalimder kúni, Energetıkter kúni, Qarjygerler kúni bar. Biraq, ókinishke qaraı, kúntizbede áli kúnge deıin Sport bapkeri kúni joq. Sport qoǵamy atynan "Sport bapkeri kúnin" resmı túrde elimizdegi kásibı merekelik kúntizbege engizýdi usynamyz", - dedi qoǵamdyq birlestik tóraǵasy Azamat Qarlyǵashev.
Uıymnyń baspasóz qyzmeti qazirgi ýaqytta mereke beıresmı túrde 30 qazanda atap ótiletinin aıtty. Alaıda odaq 7 sáýir - ataqty sportshy Qajymuqan Muńaıtpasovtyń týǵan kúninde Sport bapkeri kúnin atap ótýdi usynady.
"2021 jyldyń 7 sáýirinde elimizde uly sportshy Qajymuqan Muńaıtpasovtyń 150 jyldyǵy atap ótiledi. Biz merekeni dál osy kúni atap ótý durys dep esepteımiz", - dedi Azamat Qarlyǵashev.
Bul bastamany Qazaqstannyń sport ardagerleri qoldady.
"Bizde eńbek sińirgen bapkerler kóp. Olardyń eńbegin baǵalaý qıyn. Kópshiligi elimizdiń atyn búkil álemge tanytyp, dáripteıtin álemdik chempıondardy tárbıeledi. Bul rette bapkerlerdiń kásibı merekesi joq ekeni ókinishti", - dedi bokstan KSRO-nyń bes dúrkin chempıony, qazaqstandyq sportshylar odaǵynyń qurmetti múshesi Bolat Temirov.
"Qazaqstanda bapkerlerde eshqandaı basymdyq joq. Kóbinese olar jeńimpaz kóleńkesinde qalyp qoıady. Sondyqtan olarǵa memlekettik deńgeıde kóbirek kóńil bólý kerek", - dedi Sadyq Mustafaev.
Qazirgi ýaqytta Qazaqstan sportshylar odaǵy Prezıdent Ákimshiligi men Mádenıet jáne sport mınıstrligine usynys hat joldady. Odaq músheleri vedomstvo bergen resmı jaýapty keıinirek habarlaýǵa ýáde berdi.
