«قازاقستاننىڭ 100 جاڭا ەسىمى-2021» جوباسىنا وتىنىمدەردى قابىلداۋ باستالدى

1867
Adyrna.kz Telegram

قازاقستان رەسپۋبليكاسى اقپارات جانە قوعامدىق دامۋ مينيسترلىگى «قازاقستاننىڭ 100 جاڭا ەسىمى» جوباسىنىڭ ءتورتىنشى كەزەڭىنىڭ باستالعانىن مالىمدەدى، دەپ حابارلادى «ادىرنا» ءتىلشىسى.

وتىنىمدەردى قابىلداۋ 2021 جىلدىڭ 22 اقپانىنان 15 ناۋرىزىنا دەيىن 100janaesim.ruh.kz سايتىندا جۇزەگە اسادى.

«قازاقستاننىڭ 100 جاڭا ەسىمى» جوباسى – تاۋەلسىزدىك جىلدارىندا تابىسقا جەتكەن، ەلىمىزدىڭ ءار وڭىرىندە تۇراتىن ءتۇرلى جاستاعى، سان الۋان ەتنوس وكىلدەرىنىڭ تاريحى. جوبا 2017 جىلى ەلباسى ن. نازارباەۆتىڭ باستاماسىمەن جارىق كورىپ، بيىل دا جالعاسىن تاپتى.

«بيىلعى بايقاۋ – ەل تاۋەلسىزدىگىنىڭ 30 جىلدىعى اياسىندا ۇيىمداستىرىلۋدا. وسى جىلدار ىشىندەگى ەلىمىزدىڭ تابىستارى – ەل ازاماتتارىنىڭ ەرەن ەڭبەگىنىڭ جەمىسى. جاقسىدان ۇيرەن دەگەن حالقىمىز جاس ۇرپاقتى وسىنداي ادامداردان ونەگە الۋعا تاربيەلەگەن»،- دەدى قر اقپارات جانە قوعامدىق دامۋ ءمينيسترى ايدا بالاەۆا.

جوباعا ەلدە جانە ەلدەن تىس جەرلەردە تۇراتىن قازاقستاندىقتار قاتىسا الادى.

قاتىسۋشىلاردىڭ وتىنىمدەرى كەلەسى 7 نوميناتسيا بويىنشا ىرىكتەلەدى: مەديتسينا، ءبىلىم بەرۋ، عىلىم جانە يننوۆاتسيا، ەكولوگيا، مادەنيەت جانە سپورت، بيزنەس، قوعام.

قاتىسۋ ءۇشىن ۇمىتكەرلەر 100janaesim.ruh.kz سايتىنداعى ساۋالنامانى تولتىرۋ قاجەت. جوبا شارتتارىنا سايكەس قاتىسۋشى سەنىمدى اقپارات بەرۋگە مىندەتتەنەدى. جالعان اقپارات ۇسىنۋ، ونلاين داۋىس بەرۋ كەزىندە فالسيفيكاتسياعا جۇگىنۋ سىندى نەمەسە وزگە دە قۇقىق بۇزۋشىلىق اكتىلەرى انىقتالسا، ۇيىمداستىرۋشىلار قاتىسۋشىنى جوبادان شىعارىپ جىبەرۋگە قۇقىلى.

بارلىق وتىنىمدەر مودەراتسيادان وتەدى، كەيىن سايتتا جاريالانادى. وتىنىمدەردى قابىلداۋ مەرزىمى اياقتالعاننان كەيىن بۇكىلحالىقتىق ونلاين داۋىس بەرۋ باستالادى. سونداي-اق، وتىنىمدەردىڭ بەلگىلى ءبىر بولىگى تانىمال قوعام جانە مادەنيەت قايراتكەرلەرى، سپورت، بيزنەس وكىلدەرىنەن تۇراتىن قازىلار القاسىنىڭ قاراۋىنا ۇسىنىلادى. وعان قوسا وسى جىلدان باستاپ وتكەن ماۋسىمداردىڭ جەڭىمپازدارى قازىلار القاسىنىڭ قۇرامىنا ەنەدى.

داۋىس بەرۋ كەزىندە ەڭ كوپ ۇپاي جيناعان جانە قازىلار القاسىنىڭ تاڭداۋىنا ىلىنگەن قاتىسۋشىلار اعىمداعى جىلدىڭ ءساۋىر ايىندا جوبا جەڭىمپازدارى بولىپ اتانادى.

«ادىرنا» ۇلتتىق پورتالى

پىكىرلەر