قازاقستاندىقتار نۇرتىلەۋ يمانعاليۇلىن اقتىق ساپارعا شىعارىپ سالدى

1799

كەشە قازاقستاندىقتار ارداگەر جۋرناليست نۇرتىلەۋ يمانعاليۇلىن اقتىق ساپارعا شىعارىپ سالدى. ۇلتتىق جۋرناليستيكانىڭ دامۋىنا سۇبەلى ۇلەس قوسقان ازامات 70 جاسقا قاراعان شاعىندا ومىردەن وزعان ەدى، - دەپ حابارلايدى "ادىرنا" ۇلتتىق پورتالى Almaty.tv  ارناسىنا سىلتەمە جاساپ.

قازاق تەلەۆيزياسىنىڭ قارا نارىنداي دارا تۇلعانىڭ قازاسى كورەرمەن قاۋىمنىڭ، قازاق جۇرتىنىڭ قابىرعاسىن قايىستىرىپ كەتكەنى راس. ەلىنە بايلىق پەن قۋات تىلەگەن اردا ازامات ەل جادىنان وشپەك ەمەس.

"مەن" دەگەندى ءجيى ايتۋىما ەركىندىگىم سەبەپ". اتا تاربيەسىندە ەركىن ءوسىپ، 5 جاسىنان ءارىپ تانىعان نۇرتىلەۋ يمانعاليۇلى ءبىر سۇقباتىندا وسىلاي دەپ ەدى. راسىندا، ارداگەردىڭ وتاندىق تەلەۆيزيادا جارقىراپ ءجۇرىپ، ويىپ ورىن الۋى دا سول ەركىندىك، سول دارالىقتىڭ كورىنىسىندەي. زامانداستارى بالا نۇرتىلەۋدى اسا بەلسەندى، دوسقا ادال، سوزىنە بەرىك ەدى دەپ ەسكە الادى. ايتقانى دا، ىستەگەنى دە تابيعاتىنان الىس كەتپەگەن اردا ازامات بالا كۇنىنەن ايتىسقا، ءسوز ونەرىنە، ءان مەن سپورتقا بەيىم بولىپتى.

"سانالى عۇمىرىنىڭ ۇلكەن بولىگىن قازاق تەلەجۋرناليستيكاسىنا ارناعان قازاقتىڭ ارداقتى پەرزەنتى، ءبىزدىڭ قادىرلى، قاستەرلى، قادىرمەندى دوسىمىز نۇرتىلەۋ يمانعاليۇلىنان ايىرىلىپ وتىرمىز. بۇل قازاق تەلەجۋرناليستيكاسى ءۇشىن وتە ۇلكەن قازا", - دەدى جۋرناليست، نۇرتىلەۋ يمانعاليۇلىنىڭ دوسى مارات توقاشباەۆ.

"شىندىعىندا نۇرتىلەۋ ەش ۋاقىتتا ۇمىتىلمايدى. ونىڭ جاساعان ەڭبەگى ماڭگىلىك جاسايدى. اسىرەسە، قازاق تەلەارناسىنىڭ، ۇلتتىق ارنانىڭ ارحيۆىندە ساقتاۋلى بولىپ، كەيىنگى ۇرپاققا ارى قاراي جالعاسىپ جاتاتىنى ءسوزسىز", - دەدى نۇرتىلەۋ يمانعاليۇلىنىڭ دوسى ساپارباي تويلىباي

"شەشەن سويلەسە، قارا ءسوزدىڭ قايماعىن ايتادى. كوسەم سويلەسە، توقسان اۋىز ءسوزدىڭ توبىقتاي ءتۇيىنىن، بايلامىن ايتادى. ال، مەن سەكىلدى جۋرناليست سويلەسە، ءتىلىنىڭ ۇشىنداعى ەمەس، كوڭىلىنىڭ، جۇرەگىنىڭ تۇسىنداعى، ويداعىنى ايتادى".

ءيا، نۇرتىلەۋ يمانعاليۇلى كوڭىل كوگىندەگى، جۇرەك تۇسىنداعى ويىن اشىق ايتتى. وت  مىنەزدى، وراق ءتىلدى ارداگەر ەلدەگىنى دە، توردەگىنى دە ويلاندىرارلىقتاي ءماندى سويلەيتىنۇرتىلەۋ ءبىر سۇقباتىندا: "وزىمدى تانىتقان جۋرناليستيكاعا تالماي ەڭبەك ەتسەم، مەنەن باقىتتى ادام جوق", - دەدى.

22 جاسىندا وتاندىق تەلەۆيزيانىڭ تابالدىرىعىن اتتاپ، بار عۇمىرىن ءبىر ماماندىققا ارناعان ازامات قازاق جۋرناليستيكاسىنىڭ كوريفەيى، مەترىنە اينالدى.

"تەك قازاق تەلەۆيزياسىنىڭ ەمەس، بۇكىل قازاق جۋرناليستيكاسىنىڭ ءبۇتىن ءبىر ءداۋىرى، ەپوحاسى ءوتىپ بارا جاتقانداي سەزىمدەمىز. قيماي تۇرمىز. ارتىندا قالعان بالا-شاعا امان بولسىنۇرتىلەۋ ءوزى ايتىپ كەتكەندەي باي-قۋاتتى بولسىن ەلىمىز", - دەدى اقىن اقبەرەن ەلگەزەك.

"ەكرانداعى سۇلباسىن حالىق ءسۇيدى، سول ارقىلى قاناتتاندى. ءاربىر ونىڭ حابارى اقيقاتقا، شىندىققا جەتەلەيتىنىن كوردى. سوندىقتان دا، مىناۋ نۇرتىلەۋ اعامىزدىڭ بۇگىنگى قازاسى تەك قانا وتباسى مەن بالا-شاعاسىنا عانا ەمەس، بۇكىل قازاق ەلىنىڭ قابىرعاسىن قايىستىرىپ وتىر. جانى جانناتتا، يمانى جولداسى بولسىن!" - دەدى شاكىرتى ءنۇردىلدا وراز.

"باستايتىن توپ ىشىندە ءسوزىڭ دارا،

تورىڭە مالداس قۇرسىن ءتوزىم عانا.

سەن باردا مىنا ءبىز دە "باي-قۋاتتى"

ءبىز باردا "باي-قۋاتتى" ءوزىڭ دە، اعا!".

اقىن عالىم جايلىبايدىڭ وسى جىر جولى ءىنى بولعان، اعالىق اقىل تىڭداعان بار قاۋىمنىڭ ىزگى نيەتى ەدى. قازاق جۋرناليستيكاسى تاعى ءبىر تارلانبوزىنان ايرىلعانىمەن، ونىڭ مول مۇراسى، ۇلگى-ونەگەسى ۇرپاق جادىندا جاتتالارى ءسوزسىز.

 

پىكىرلەر
ۇقساس جاڭالىقتار
Серіктестер/Партнеры
Студия IMA - создание сайтов Доставка цветов Астана - Lova Buket