Keshe qazaqstandyqtar ardager jýrnalıst Nurtileý Imanǵalıulyn aqtyq saparǵa shyǵaryp saldy. Ulttyq jýrnalıstıkanyń damýyna súbeli úles qosqan azamat 70 jasqa qaraǵan shaǵynda ómirden ozǵan edi, - dep habarlaıdy "Adyrna" ulttyq portaly Almaty.tv arnasyna silteme jasap.
Qazaq televızııasynyń qara naryndaı dara tulǵanyń qazasy kórermen qaýymnyń, qazaq jurtynyń qabyrǵasyn qaıystyryp ketkeni ras. Eline baılyq pen qýat tilegen arda azamat el jadynan óshpek emes.
"Sanaly ǵumyrynyń úlken bóligin qazaq telejýrnalıstıkasyna arnaǵan qazaqtyń ardaqty perzenti, bizdiń qadirli, qasterli, qadirmendi dosymyz Nurtileý Imanǵalıulynan aıyrylyp otyrmyz. Bul qazaq telejýrnalıstıkasy úshin óte úlken qaza", - dedi jýrnalıst, Nurtileý Imanǵalıulynyń dosy Marat Toqashbaev.
"Shyndyǵynda Nurtileý esh ýaqytta umytylmaıdy. Onyń jasaǵan eńbegi máńgilik jasaıdy. Ásirese, qazaq telearnasynyń, ulttyq arnanyń arhıvinde saqtaýly bolyp, keıingi urpaqqa ary qaraı jalǵasyp jatatyny sózsiz", - dedi Nurtileý Imanǵalıulynyń dosy Saparbaı Toılybaı
"Sheshen sóılese, qara sózdiń qaımaǵyn aıtady. Kósem sóılese, toqsan aýyz sózdiń tobyqtaı túıinin, baılamyn aıtady. Al, men sekildi jýrnalıst sóılese, tiliniń ushyndaǵy emes, kóńiliniń, júreginiń tusyndaǵy, oıdaǵyny aıtady".
Iá, Nurtileý Imanǵalıuly kóńil kógindegi, júrek tusyndaǵy oıyn ashyq aıtty. Ot minezdi, oraq tildi ardager eldegini de, tórdegini de oılandyrarlyqtaı mándi sóıleıtiNurtileý Bir suqbatynda: "Ózimdi tanytqan jýrnalıstıkaǵa talmaı eńbek etsem, menen baqytty adam joq", - dedi.
22 jasynda otandyq televızııanyń tabaldyryǵyn attap, bar ǵumyryn bir mamandyqqa arnaǵan azamat qazaq jýrnalıstıkasynyń korıfeıi, metrine aınaldy.
"Tek qazaq televızııasynyń emes, búkil qazaq jýrnalıstıkasynyń bútin bir dáýiri, epohasy ótip bara jatqandaı sezimdemiz. Qımaı turmyz. Artynda qalǵan bala-shaǵa aman bolsyNurtileý Ózi aıtyp ketkendeı baı-qýatty bolsyn elimiz", - dedi aqyn Aqberen Elgezek.
"Ekrandaǵy sulbasyn halyq súıdi, sol arqyly qanattandy. Árbir onyń habary aqıqatqa, shyndyqqa jeteleıtinin kórdi. Sondyqtan da, mynaý Nurtileý aǵamyzdyń búgingi qazasy tek qana otbasy men bala-shaǵasyna ǵana emes, búkil qazaq eliniń qabyrǵasyn qaıystyryp otyr. Jany jannatta, ımany joldasy bolsyn!" - dedi shákirti Nurdildá Oraz.
"Bastaıtyn top ishinde sóziń dara,
Tórińe maldas qursyn tózim ǵana.
Sen barda myna biz de "baı-qýatty"
Biz barda "baı-qýatty" óziń de, aǵa!".
Aqyn Ǵalym Jaılybaıdyń osy jyr joly ini bolǵan, aǵalyq aqyl tyńdaǵan bar qaýymnyń izgi nıeti edi. Qazaq jýrnalıstıkasy taǵy bir tarlanbozynan aırylǵanymen, onyń mol murasy, úlgi-ónegesi urpaq jadynda jattalary sózsiz.
