مەملەكەت باسشىسى تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات ءمۋسيندى قابىلدادى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
قاسىم-جومارت توقاەۆقا مينيسترلىكتىڭ 2020 جىلدىڭ قورىتىندىسى بويىنشا اتقارعان جۇمىستارى، تسيفرلاندىرۋدىڭ دامۋ پەرسپەكتيۆالارى، سونداي-اق، ينتەرنەت بايلانىسىنا، سونىڭ ىشىندە، پرەزيدەنتتىڭ حالىققا جولداۋىنداعى اۋىلدىق جەرلەردە قول جەتىمدىلىكتى ارتتىرۋعا باعىتتالعان تاپسىرمالارىنىڭ ورىندالۋ بارىسى تۋرالى ەسەپ بەرىلدى.
مينيستر مەملەكەت باسشىسىنا بايلانىس ساپاسىنىڭ تالاپتارى بەكىتىلگەنى جونىندە باياندادى. ەندى 3G/4G جەلىلەرى ءۇشىن ساپانىڭ تومەنگى شەگى انىقتالدى. بۇعان دەيىن بايلانىس ساپاسىنىڭ تومەنگى شەگى رەگلامەنتتەلمەگەن بولاتىن.
سونىمەن قاتار راديوتولقىنداردى اۋكتسيون فورماتىندا انىقتاۋ جونىندەگى زاڭناماعا ەنگىزىلەتىن وزگەرىستەر ازىرلەندى. بۇل 5G جەلىسىنە كوشۋدە ماڭىزدى ءرول اتقارادى. سونداي-اق ەنگىزىلەتىن وزگەرىستەرگە سايكەس بايلانىس ساپاسىنىڭ پارامەترلەرىن بۇزعانى ءۇشىن سالىناتىن ايىپپۇل كولەمى 1000 اەك بولماق.
پرەزيدەنتكە مەملەكەتتىك قىزمەت كورسەتۋدىڭ قول جەتىمدىلىگىن قامتاماسىز ەتۋ ءۇشىن قابىلدانعان شارالار تۋرالى باياندالدى.
مينيستر eGov mobile ءموبيلدى قوسىمشاسىنا بيومەتريالىق سايكەستەندىرۋ جۇيەسىن ەنگىزۋ جايىندا ايتتى. بۇل حالىقتىڭ مەملەكەتتىك قىزمەت كورسەتۋ جۇيەسىنە تىركەلىپ، قىزمەت الۋ ۋاقىتىن ەداۋىر قىسقارتۋعا مۇمكىندىك بەرەدى. قاسىم-جومارت توقاەۆ اتالعان قوسىمشا ارقىلى مەملەكەتتىك قىزمەت كورسەتۋ جۇمىستارىن تەزدەتۋدى تاپسىردى.
پرەزيدەنتكە «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋ اياسىندا قولعا الىنعان ە-ارىز-شاعىمدار قىزمەت جۇيەسى تانىستىرىلدى. بۇل ازاماتتاردىڭ كومپيۋتەر تۇيمەسىن بىرنەشە مارتە باسۋ ارقىلى ءوتىنىش-شاعىمدارىن بەرۋىنە جانە جەدەل تۇردە مەملەكەتتىك ورگانداردان جاۋاپ الۋىنا مۇمكىندىك بەرەدى. مەملەكەت باسشىسى وسىنداي قىزمەتتىڭ قۇرىلۋىنا قولداۋ ءبىلدىرىپ، ونى ءتيىمدى ەنگىزۋگە تاپسىرما بەردى.
سونىمەن قاتار باعدات مۋسين قاسىم-جومارت توقاەۆقا «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ جۇمىسى، ونىڭ ىشىندە، بۇكىل ەلىمىز بويىنشا حالىققا قىزمەت كورسەتەتىن 115 ورتالىقتى جاڭعىرتۋ جوسپارى تۋرالى ايتتى. وسىعان بايلانىستى مەملەكەتتىك كورپوراتسيانىڭ كادرلىق الەۋەتىن ارتتىرۋ ماسەلەسى وتە ماڭىزدى بولماق.
قاسىم-جومارت توقاەۆقا باسشىلىق قىزمەتتەرگە ۇمىتكەرلەردى، سونىڭ ىشىندە، حالىققا قىزمەت كورسەتۋ ورتالىقتارىنىڭ جەتەكشىلەرىن ىرىكتەگەندە پرەزيدەنتتىك جاستار كادرلىق رەزەرۆىنىڭ تاجىريبەسىن پايدالاناتىنى جونىندە مالىمەت بەرىلدى. مەملەكەت باسشىسى بۇل يدەيانى قولداپ، ىرىكتەۋ ۇدەرىسىنىڭ بارىنشا اشىق بولۋىن قامتاماسىز ەتۋدىڭ ماڭىزدىلىعىنا نازار اۋداردى. بۇل جۇمىستار مەملەكەتتىك قىزمەت ىستەرى اگەنتتىگىمەن بىرلەسە اتقارىلادى.
باعدات مۋسين قاسىم-جومارت توقاەۆقا «تسيفرلىق قازاقستان» ۇلتتىق جوباسىنىڭ ترانسفورماتسيالانۋ ۇدەرىسى تۋرالى باياندادى. وندا مەملەكەتتىڭ ازاماتتارمەن ءوزارا ىقپالداستىعىنا، حالىقتىڭ ماسەلەلەرىن شەشۋگە بايلانىستى بارلىق تىنىس-تىرشىلىكتى ەسەپكە الۋعا باسا ءمان بەرىلەدى.
بۇدان بولەك مينيستر مەملەكەت باسشىسىنا قازاقستاندىق «KazSat» بايلانىس سەرىگىنىڭ جۇيەسىن دامىتۋ جونىندە باياندادى. اتاپ ايتقاندا يننوۆاتسيالىق شەشىمدەردىڭ پايداسى ءۇشىن، سونىڭ ىشىندە بايلانىس سەرىكتەرىنىڭ جاڭا تۇرلەرىنىڭ شىعۋىمەن بايلانىستى «KazSat-2R» جوباسىن توقتاتۋ تۋرالى شەشىم قابىلداندى. بۇل بيۋدجەتتىڭ ميللياردتاعان تەڭگە قارجىسىن ۇنەمدەۋگە مۇمكىندىك بەرەدى.
«ادىرنا» ۇلتتىق پورتالى
