قازاق جىگىتى سانجار تايجان ەلەكتروموبيل ويلاپ تابۋىنىڭ ارقاسىندا يلون ماسكتىڭ بايقاۋىندا فينالعا شىقتى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگى رەسمي Facebook پاراقشاسىندا جاريا ەتتى.
يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ سانجار تايجانمەن كەزدەسىپ قايتتى. ونەرتاپقىش مينيسترگە ءوزىنىڭ جاڭا جوباسى – قازاقستاندىق ەلەكتروموبيلدى تانىستىردى. ول بۇل جوباسىمەن امەريكالىق بيزنەسمەن يلون ماسك ۇيىمداستىرعان Not-A-Boring Competition بايقاۋىنا قاتىسىپ جاتىر ەكەن.
سانجار تايجان ءوز كومانداسىمەن بىرگە بەنزينمەن جۇرەتىن اۆتوموبيلدەردى باتارەيامەن قوزعالاتىن ەلەكتر كولىكتەرى ەتىپ، قايتا جاڭعىرتۋدا. ول كولىگىنىڭ ءپروتوتيپىن مينيسترگە كورسەتىپ، ەرەكشەلىكتەرى تۋرالى ايتىپ بەردى.
«قازىر ەلەكتر كولىگى جاقسى اۋا-رايىندا 100 شاقىرىمنان استام قاشىقتىققا جۇرە الادى. ال ءبىز ونى 500-600 شاقىرىمعا دەيىن ارتتىرا الامىز. باستى ماقساتىمىز – ەلەكتروموبيلدەردىڭ العاشقى قازاقستاندىق برەندىن جاساۋ. جاقىن ارادا ديزاينى مۇلدە جاڭا 30 پروتوتيپ ازىرلەپ، مودەلگە 200-دەن استام پاتەنت الۋدى جوسپارلاپ وتىرمىز»، – دەيدى سانجار تايجان.
ستارتاپ اۆتورلارى ەلىمىزدەگى تاكسي مەن قوعامدىق كولىكتەردى ەلەكتر تۇرىنە اۋىستىرۋدى كوزدەپ وتىر. بەيبىت اتامقۇلوۆ بولسا، تابيعاتتى ساقتاۋعا جانە جاڭارتىلاتىن قۋات كوزدەرىن پايدالانۋعا ىقپال ەتەتىن جاڭا تەحنولوگيالاردى دامىتۋدى قولداۋدىڭ ماڭىزدىلىعىن اتاپ ءوتتى.
ەلىمىزدىڭ مينيسترلىگى مەن سانجار تايجاننىڭ كومپانياسى جوبانى ىسكە اسىرۋ ءۇشىن بىرلەسىپ ينۆەستورلار ىزدەستىرۋدى جوسپارلاپ وتىر. ودان بولەك، مينيسترلىك ستارتاپتى دامىتۋعا جانە ونىڭ ونىمدەرىن ىلگەرىلەتۋگە جاردەمدەسەدى.
