Qazaq jigiti Sanjar Taıjan elektromobıl oılap tabýynyń arqasynda Ilon Masktyń baıqaýynda fınalǵa shyqty. Bul týraly Indýstrııa jáne ınfraqurylymdyq damý mınıstrligi resmı Facebook paraqshasynda jarııa etti.
Indýstrııa jáne ınfraqurylymdyq damý mınıstri Beıbit Atamqulov Sanjar Taıjanmen kezdesip qaıtty. Ónertapqysh mınıstrge óziniń jańa jobasy – qazaqstandyq elektromobıldi tanystyrdy. Ol bul jobasymen amerıkalyq bıznesmen Ilon Mask uıymdastyrǵan Not-A-Boring Competition baıqaýyna qatysyp jatyr eken.
Sanjar Taıjan óz komandasymen birge benzınmen júretin avtomobılderdi batareıamen qozǵalatyn elektr kólikteri etip, qaıta jańǵyrtýda. Ol kóliginiń prototıpin Mınıstrge kórsetip, erekshelikteri týraly aıtyp berdi.
«Qazir elektr kóligi jaqsy aýa-raıynda 100 shaqyrymnan astam qashyqtyqqa júre alady. Al biz ony 500-600 shaqyrymǵa deıin arttyra alamyz. Basty maqsatymyz – elektromobılderdiń alǵashqy qazaqstandyq brendin jasaý. Jaqyn arada dızaıny múlde jańa 30 prototıp ázirlep, modelge 200-den astam patent alýdy josparlap otyrmyz», – deıdi Sanjar Taıjan.
Startap avtorlary elimizdegi taksı men qoǵamdyq kólikterdi elektr túrine aýystyrýdy kózdep otyr. Beıbit Atamqulov bolsa, tabıǵatty saqtaýǵa jáne jańartylatyn qýat kózderin paıdalanýǵa yqpal etetin jańa tehnologııalardy damytýdy qoldaýdyń mańyzdylyǵyn atap ótti.
Elimizdiń mınıstrligi men Sanjar Taıjannyń kompanııasy jobany iske asyrý úshin birlesip ınvestorlar izdestirýdi josparlap otyr. Odan bólek, mınıstrlik startapty damytýǵa jáne onyń ónimderin ilgeriletýge járdemdesedi.
