بەكبولات قارجان.الەمدىك دەڭگەيدەگى مەنەدجەر جاكىشوۆتى تابالايتىنداي كىم ەدىڭىز؟

3333
Adyrna.kz Telegram

 

مەن مۇحتار جاكىشەۆتى تابالاپ وتىرعاندارعا تاڭ قالامىن. 1991-2000 جىلدار ارالىعىندا قازاقستاننىڭ تەحنولوگيالىق-وندىرىستىك الەۋەتىنىڭ بوي كوتەرىپ كەتۋىنە ەڭ ءبىرىنشى ىقپال ەتكەن دە وسى جاكىشەۆتەر بولاتىن. تەك وندىرىستىك سالا عانا ەمەس، ساياساتتا دا وسى بۋىننىڭ قارقىنى تالايلاردى ويلاندىرىپ تاستاعان ەدى. بۇلار ناعىز رەفورماتورلار ەدى.

سول كەزدە ءبىزدىڭ ەلدەگى ەكونوميكانى ءارتاراپتاندىرۋ مەن ءوندىرىس پەن ۇلتتىق عىلىمدى، تەحنولوگيانى دامىتۋدى وسىنداي جىگىتتەرگە بەرگەندە، ءدال قازىر قازاق جۇرتى فەيسبۋكتە شۋىلداپ، ءبىرىنىڭ ەتىن ءبىرى جەپ وتىرماي، قالىڭ قايعىعا باتىپ، جۇمىسسىز اقساپ، قابات-قابات كريزيسكە تاپ كەلمەي وتىراتىن ەدى. سەبەبى، تەحنولوگتار مەن تەحنوكراتتار كەز كەلگەن ەلدىڭ ءوندىرىسى مەن الەۋمەتتىك احۋالىن تۇزەي الادى.

جاكىشەۆ قازاقاتومونەركاسىبىنىڭ تاسىن ورگە دومالاتقان تۇڭعىش تەحنولوگ، تەحنوكرات. ونىڭ گەنيلىگى، ونەرتابىسى باتىس ەلدەرىندە ءوزىنىڭ باعاسىن الدەقاشان الىپ قويعان. ەگەر جاكىشەۆ قازاقستاندى ويلاماعان بولسا، كەزىندە اقش-تىڭ شاقىرتۋى بويىنشا كەتىپ تە قالار ەدى. 1990 جىلدارى قازاقاتومونەركاسىبىنىڭ الەۋەتى ادام ايتقىسىز ايانىشتى ەدى.

مۇحتار جاكىشەۆتىڭ باستى ماقساتى – قازاق ۋرانىن ەركىن نارىققا شىعارۋ بولاتىن. ونىڭ قازاق ۋرانىن الەمدىك ەركىن نارىق پەن باسەكەگە شىعارۋعا ءبىلىمى مەن تاجىريبەسى، قايراتى جەتتى. مەنەدجەرلىك قولىنان كەلدى. وتاندىق ونەركاسىپتى شەتەلدىڭ الدىڭعى قاتارلى بىرلەسكەن كاسىپورىندارى ارقىلى يگەرۋگە تالپىندى. ونىڭ ىشىندە اقش، كانادا، جاپونيا، اۆستراليا ەلدەرىنىڭ كاسىپورىندارى دا بولدى. سول بىرلەسكەن كاسىپورىنداردىڭ زاماناۋي يننوۆاتسيالىق-تەحنولوگيالىق  باسقارۋ جۇيەسى مەن قوندىرعىلارىن پايدالانىپ، قازاقستان ۋرانىن ەركىن نارىققا شىعارۋعا بارىن سالۋعا تىرىستى. جاكىشەۆ قولعا تۇسكەن ساتتەن-اق ەلدەن جاپونيانىڭ كاسىپورىنى كەتىپ قالدى. بۇل ءبىزدىڭ ۇلكەن ۇتىلىسىمىز بولدى.

 

جاكىشەۆ قازاقاتومونەركاسىبىنىڭ رەيتينگىن دامىعان اقش، جاپونيا، كانادا، اۆستراليا ەلدەرىنىڭ بىرلەسكەن كاسىپورىندارى كەلمەي جاتىپ-اق الەمدىك دەڭگەيگە كوتەرىپ تاستاعان. سونىڭ ارقاسىندا ەل بيۋدجەتىنە تالاي-تالاي ميللياردتار ءتۇستى، تالاي-تالاي مەكتەپتەر مەن نىساندار بوي كوتەردى. ال ەندى وسىنداي ازاماتتى تابالاۋ كەرەك پە... ءبىزدىڭ قوعام وزىنەن شىققان تەحنوكراتتاردى باعالاماي، ەشقاشان دا جەتىستىككە جەتە المايدى. ەل بولامىز دەسەك، ءبىز ەڭ الدىمەن تەحنيكا مەن تەحنولوگيانىڭ تەحنوكراتتارىن قوعامعا ۇلگى ەتۋىمىز كەرەك. ول دا قولىمىزدان كەلمەي وتىر عوي. ءبىزدىڭ ءپىرىمىز، تابىنارىمىز انشىلەر، سايقىمازاقتار بولعاننان كەيىن بىزگە قايداعى دامۋ مەن ءوسۋ... ەندى مۇنداي ازاماتتى جەردەن الىپ جەرگە سالىپ وتىرعاندار جاكىشەۆتىڭ تاعدىرىن باسىنان وتكەرسە دە تۇسىنە المايتىن سياقتى. ولارعا ءسوز شىعىن، ايتارىم جوق...

 

بەكبولات قارجان،

«ادىرنا» ۇلتتىق پورتالى

 

پىكىرلەر