ورالدا كوپقاباتتى ۇيدەگى پاتەر ورتەنىپ، 32 ادام ەۆاكۋاتسيالاندى، دەپ حابارلايدى «ادىرنا» ءتىلشىسى.
بقو تج دەپارتامەنتى ءباسپاسوز قىزمەتىنىڭ حابارلاۋىنشا، ءورت وقيعاسى دەر كەزىندە اۋىزدىقتالعان.
«2021 جىلعى 03 اقپان كۇنى 10 ساعات 18 مينۋتتا بقو تجد داعدارىس جاعدايىندا باسقارۋ باسقارماسىنا اقوتاۋ كوشەسى 24/1 مەكەنجايىنداعى پاتەردەن ءورت شىققانى جونىندە حابار كەلىپ ءتۇستى. ءورت جۇمىستارىن بارلاۋ بارىسىندا 5 قاباتتى كوپ پاتەرلى تۇرعىن ءۇيدىڭ 4-قاباتىنىڭ پاتەرىندە جيھاز بەن جەكە زاتتار جانىپ جاتقانى انىقتالدى، ءورت پاتەردىڭ 15 ش/م شارپىپ ءوتتى»،-دەلىنگەن ۆەدوموستۆودا.
وقيعا ورنىنان ءورت ءسوندىرۋشى-قۇتقارۋشىلاردىڭ كۇشىمەن 3 ادام قۇتقارىلدى. ونىڭ ىشىندە 2-ءۋى بالا. سونداي-اق 32 ادام ەۆاكۋاتسيالاندى.
قۇتقارىلعان 3 ادامنىڭ ىشىندە 1 ەر ادام اۆتوساتىنىڭ كومەگىمەن تەرەزەدەن شىعارىلىپ، 2 بالا قۇتقارۋشىلاردىڭ كومەگىمەن ەسىكتى بۇزۋ ارقىلى شىعارىلدى.
وقيعا ورنىندا جالپى 12 بىرلىك تەحنيكا مەن 35 قىزمەتكەر جۇمىس اتقاردى.
«ادىرنا» ۇلتتىق پورتالى
