COVID-19 ىندەتىمەن كۇرەسۋ ماقساتىندا الەمنىڭ ءارتۇرلى ەلدەرىندە بىرنەشە ۆاكتسينا جاسالعان بولاتىن. بۇگىندە كوروناۆيرۋسقا قارسى 200-گە جۋىق ۆاكتسينا بار بولسا، ونىڭ 63-ءى كلينيكالىق سىناقتان ءوتىپ جاتىر. ال التى ۆاكتسينا دۇنيەجۇزى مەملەكەتتەرىندە حالىقتى ۆاكتسيناتسيالاۋ ءۇشىن قولدانىلۋدا. دەسە دە، كلينيكالىق زەرتتەۋلەردىڭ ءۇشىنشى كەزەڭى ءالى اياقتالعان جوق. قازىرگى تاڭدا پاندەمياعا قارسى قانداي ۆاكتسينالار بار جانە ولار قاي ەلدەردە قولدانىلىپ جاتىر؟ «ادىرنا» ءتىلشىسى ەڭ تانىمال ەكپەلەر تىزبەگىن نازارلارىڭىزعا ۇسىنادى.
Pfizer, BioNTech ۆاكتسيناسى
امەريكاندىق فارماتسەۆتيكالىق كومپانيا «Pfizer» مەن نەمىس «BioNTech» كومپانياسى جاساعان ۆاكتسينا – ددۇ-مەن رەسمي تۇردە ماقۇلدانعان العاشقى ۆاكتسينا. جىل باسىندا ەۋروپالىق كوميسسيا Pfizer/BioNTech كومپانيالارى جاساپ شىعارعان ۆاكتسينانىڭ
300 ملن دوزاسىن ساتىپ الاتىنىن حابارلاعان ەدى.
الەمنىڭ 19 ەلى ءوز ازاماتتارىن ءدال وسى ۆاكتسينانىڭ كومەگىمەن ۆيرۋستان قورعاۋعا نيەتتى. ولاردىڭ قاتارىندا اقش، ۇلىبريتانيا، ساۋد ارابياسى سىندى ەلدەر بار. قازىرگى تاڭدا ەكپە گەرمانيا مەن بەلگيادا شىعارىلادى.
Moderna ۆاكتسيناسى
امەريكالىق Moderna بيوتەحنولوگيالىق كومپانياسى ازىرلەگەن ۆاكتسينا وتكەن جىلدىڭ جەلتوقسان ايىندا امەريكا قۇراما شتاتتارىندا قولدانۋعا رۇقسات ەتىلدى. 6 قاڭتاردا ول ەو-دا ماقۇلدانعان بولاتىن. ەكپەنى ازىرلەۋشىلەر ۆاكتسينانىڭ كوپ بولىگىن Moderna كاسىپورىندارىنىڭ ءبىرى ورنالاسقان ماسساچۋسەتس شتاتىندا شىعاراتىندارىن مالىمدەدى. 2021 جىلى شامامەن 1 ملرد دوزا ءوندىرۋ جوسپارلانۋدا.
ايتا كەتەيىك، امەريكالىق ۆاكتسينانىڭ 80 ميلليون دوزاسىن ەۋروپالىق وداق ساتىپ الۋعا نيەت ءبىلدىردى. ونى اقش، جاپونيا، شۆەيتساريا، وڭتۇستىك كورەيا، گەرمانيا مەملەكەتتەرى قولدانباق.
Sputnik V ۆاكتسيناسى
Sputnik V – كوروناۆيرۋسقا قارسى العاشقى تىركەلگەن ۆاكتسينا. ونى رەسەيدەگى گامالەيا اتىنداعى ۇلتتىق ەپيدەميولوگيا جانە ميكروبيولوگيا زەرتتەۋ ورتالىعىنىڭ عالىمدارى ويلاپ تاپتى. ەكپەنى الۋعا بەلارۋس، ارگەنتينا، الجير، سەربيا، ءۇندىستان سەكىلدى 50-دەن استام ەل تاپسىرىس بەردى.
ەلىمىزدە 1 اقپاننان باستاپ سپۋتنيك V ۆاكتسيناسىن سالۋ باستالدى. ەكپەنى العاشقىلاردىڭ ءبىرى بولىپ باس مەملەكەتتىك سانيتار دارىگەر ەرلان قياسوۆ، دەنساۋلىق ساقتاۋ ۆيتسە-ءمينيسترى اجار عينيات، الماتى قالاسىنىڭ باس مەملەكەتتىك سانيتارلىق دارىگەرى جانداربەك بەكشين، الماتى قالاسى اكىمىنىڭ ورىنباسارى ەرجان باباقۇماروۆ الىپ ۇلگەردى.
Sinopharm ۆاكتسيناسى
قىتايدا جاسالعان Sinopharm ۆاكتسيناسى قازىر كلينيكالىق زەرتتەۋلەردىڭ سوڭعى كەزەڭىنەن وتۋدە. بۇل مەملەكەت ۆاكتسيناتسيالاۋدى باستاعان ەلدەردىڭ قاتارىندا بولماسا دا، ءىس جۇزىندە ميلليونعا جۋىق قىتايلىق ەكپە العان بولاتىن.
ۆاكتسينا بىرىككەن اراب امىرلىكتەرىندە قولدانۋعا رۇقسات ەتىلدى. رەسمي دەرەكتەرگە سۇيەنسەك، ەل 3 ميلليون دوزاعا تاپسىرىس بەردى. سونداي-اق، باحرەين مەن پاكىستان دا وسى پرەپاراتتىڭ 1,2 ميلليون دوزاسىن ساتىپ الۋعا دايىن ەكەنىن مالىمدەدى. 2021 جىلدىڭ اياعىنا دەيىن Sinopharm ۆاكتسينانىڭ ميلليارد دوزاسىن شىعارماق.
QazCovid-In ۆاكتسيناسى
وتاندىق QazCovid-In كلينيكالىق سىناقتىڭ ءۇشىنشى فازاسىنان ءوتىپ جاتىر. ونىڭ قۇرامىندا السىرەتىلگەن ۆيرۋس بار. ۆاكتسينا قولدانىسقا 2021 جىلدىڭ ەكىنشى توقسانىنان باستاپ ەنگىزىلەدى.
ەسكە سالايىق، بۇعان دەيىن پرەمەر-مينيستر وتاندىق ەكپەنىڭ تيىمدىلىگى 96 پروتسەنت ەكەندىگىن اتاپ وتكەن ەدى.
«ادىرنا» ۇلتتىق پورتالى
