ءبىر جىلدان بەرى يۋتۋبەرگە اينالىپ كەتتىك. ءسابيىمىز دۇنيەگە كەلگەن سوڭ، You-Tube سياقتى نەگىزگى جۇباتۋشى بارىنا كوزىمىز جەتە ءتۇستى. بۇرىن ءسابيىنىڭ قولىنا گادجەت ۇستاتا سالىپ، ءوز شارۋاسىنا اينالا بەرەتىن اتا-انانى جاقتىرمايتىن ەدىم. ءوز باسىما كەلگەندە... ءالى دە قارسىلاسىپ جاتىرمىن.
قالاۋبەگىمە ۇيدەگى بەس تەلەفوندى بەرە سالۋعا ازاماتتىق ءھام اكەلىك، ءتىپتى بولماسا، وتاعاسىلىق قۇقىمدى كولدەنەڭ تارتا وتىرىپ، كادىمگىدەي قارسىلاسامىن. كوزىن، ءوزىن ساقتاعىم كەلەدى. ءتىپتى بولماي بارا جاتسا، You-Tube-ءتىڭ قازاق تىلىندەگى ارنالارىنان ءان تىڭداتام، مۋلتفيلم كورسەتەم. "تورعاي-تV", "قوشاقان-تV" سياقتى جاقسى ارنالار بار. ارينە، جاقسى نيەتپەن اشىلعان دۇنيەلەر عوي، تىلدەرىندە ازداپ اكتسەنت تە جوق ەمەس. دەگەنمەن قالا بالالارىنىڭ جوقتىڭ ورنىن تولتىرۋعا تىرىسقان ەڭبەگىن باعالاماي بولمايدى.
ەندى ءبىر وي كەلدى. بالالارىمىزدىڭ ءتىلىن زامان جەتىستىگى بۇزا بەرمەسىن دەسەك، قازاق تىلىندەگى ارنالاردى مەيلىنشە كوبەيتۋىمىز كەرەك ەكەن. ءوزىم بالىق اۋلاۋدى قاتتى ۇناتام. بىراق قازاق تىلىندە "ۆدالي وت گورودا" جانە ابزال س. ارناسىنان باسقا ەشتەڭە جوق. "ستەپنوي وحوتنيك" پەن "Always Alone" ارناسىنىڭ كورەرمەنى بولىپ جۇرە بەرەمىز بە؟
7 سىنىپتا وقيتىن ۇلىم ولجاس وقاستىڭ "Kolesa KZ" ارناسىن قاتتى كورەدى. ولجەكەڭە راحمەت، ناعىز كاسىپقوي مامان قازىر! بىراق ارپا ىشىندە - ءبىر بيداي...
كولىگىمىزدەن كىلتيپان شىعا قالسا، ورىس تىلىندە قاپتاعان كەڭەستى شەكەسىنەن شەرتىپ ءجۇرىپ تاڭدايمىز. قازاقشا - جوق!.. بىزدە ماشينە موتورىن تۇسكە دەيىن-اق شاشىپ جوندەپ الاتىن جىگىتتەر بار عوي. سولارعا ءبىر ءجون سىلتەپ جىبەرسە، ارنانى وزدەرى-اق دوڭگەلەتىپ اكەتەدى، ءسىرا...
سابيلەرگە ورالايىق. ولاردى قازىر الداندىراتىن، ەڭ باستىسى، ءتىلىن شىعاراتىن نارسە - ءتۇرلى گادجەتتەر. اناسىنىڭ قولى تيمەي، الەۋجەلىگە پىسىرگەن شۇجىعى مەن ساتىپ العان كويلەگىن سالىپ جاتقاندا، ءسابي باسقا ءتىل ارقىلى اقپارات الىپ، سونىڭ تەرەڭىنە ەنىپ بارادى. سوندىقتان فب بەتىندە ساياسي شولۋشى، الەۋمەتتىك قورعاۋشى بولۋعا اسىقپاي، الەۋەتىڭىزدى قازاقشا كونتەنتكە جۇمساساڭىز، قانەكي! 10 ادام قاراسا دا، ميلليون ادام قاراسا دا، ءبارىنىڭ تۇبىندە اقشا تابۋ مۇددەسى ەمەس، ءسابي مۇددەسى جاتسا-شى، شىركىن! كونتەنت كوبەيسە، قاراۋشى دا كوبەيەدى. گارانتيا!
وتىز جىل ەركىن ءومىر سۇرگەندە، بالالارىمىزدىڭ ءتىلى باسقاشا شىعاتىن كۇيگە جەتىپپىز. كوپ تانىسىمدا سولاي. وزدەرى دە اڭ-تاڭ. ايتپەسە، جەتپىس جەتى اتاسىنىڭ ءتىلى شۇلدىرلەپ كورمەگەن عوي...
